Thla ruk chhungin HIV vei mi 1,170 hmuh chhuah a ni

Kumin April aṭanga September thla thleng (thla ruk chhung) khan Mizoramah HIV vei mi 1,170 hmuh chhuah a ni a, chawhrualin ni tin (Inrinni leh Pathianni telin) mi paruk aia tam (mi 6.39) hmuh chhuah an awm ziah ang a ni.

Mizoram State AIDS Control Society (MSACS) report-a tarlan danin, October 1990 aṭanga kumin March thla thlenga report-ah Mizorama HIV vei hmuh chhuah tawh zat chu mi 28,344 an ni a, kumin September thla thlenga report-ah mi 29,514 an tling a; thla ruk chhung (April-September 2023) chhungin mi 1,170 hmuh chhuah an ni tihna a ni.

Mi náwlpui (general client) bikah March 2023 thlenga HIV vei hmuh chhuah zat chu mi 25,969 an ni a, thla ruk hnu, September 2023-ah chuan 27,080 a tling tawh a, a inthlauhna chu 1,111 a ni. General client bikah hian April-September 2023 chhungin HIV vei ni tin mi paruk chuang (mi 6.07) an awm ziah ang a ni.

Nu nau pai - ANC (antenatal care) apiang HIV an vei leh vei loh enfiah a ni ṭhin a; kumin April-September chhungin nu nau pai zingah HIV vei mi 59 hmuh chhuah a ni a, October 1990 aṭanga September 2023 thlengin nau pai zingah HIV positive mi 2,434 hmuh chhuah a ni tawh.

MSACS chhinchhiah danin, September 30, 2023 thlengin Mizorama HIV+ve zinga mi 4,703 an thi tawh a, chu'ngte chu mipa 3,082, hmeichhia 1,541 leh naupang 80 an ni.

Anti retroviral therapy (ART) centre-ah HIV vei mi 23,857 inziak lut tawhin, mipa 14,195, hmeichhia 8,977 leh naupang 685 an ni a; ART damdawi la tawh mi 21,303 an awm a, mipa 12,630, hmeichhia 8,044 leh naupang 629 an ni.