Vawiinah sorkar lâ lut dawn; Lirthei dah phal lohna hmun

Mizoram State Legislative Assembly pakuanaa sorkar din tura chak ZPM party kaihhruai Mizoram sorkar chu vawiin chawhma dar 11 hian lâk luh a ni dawn.

Ruahman dan chuan, sorkar lak luhna inkhawm hi Raj Bhavan tualah neih tur a ni a, inbuatsaihna pawh nimin tlai thleng khan kalpui a ni a; ruah a sûr chuan Assembly Annex conference hall-a neih turin ruahmanna siam tel a ni bawk.

Swearing-in ceremony hi chief secretary Dr Renu Sharma-i'n a kaihruai dawn a; Governor Dr Hari babu Kambhampati-a'n chief minister atan Lalduhoma chu rinawmna thu tiamtirin a la lut ang a, chumi hnuah minister turte a la lut leh ang.

Sorkar lak luh inkhawm neih a nih dawn avang hian Aizawl Traffic SP chuan thupek chhuahin, lirthei dah phal lohna hmun a tarlang.

Lirthei dah phal lohna hmunte chu - Assembly House Annex Building Basement-I, Assembly House Annex Building Basement-II, Aizawl South Treasury Office kawt, Planning Office kawt, Aizawl City Park chhehvel, Raj Bhavan chhim lam gate aṭanga PCCF office inkar leh Tennis Court aṭanga Land Revenue & Settlement directorate inkarte a ni.