KHAWTHLIR

Tour buatsaih

Assam Rifles chuan November 20 - December 5, 2023 chhung khan Mizo zirlai mi 21 tan National Integration Tour an buatsaih a, Punjab state an tlawhpui. Punjab-ah hian Sharda Sham Singh Attariwala, Punjab War Museum, Wagah Border, sipai ralthuam dahna hmun, Jallianwala Bagh leh Golden Temple-te tlawhpui an ni a, sipai hotu ṭhenkhatte hmuhna hun an siamsak bawk.

DC hoin thukhawm

Aizawl District Committee in Fire Prevention chu an chairman Nazuk Kumar, bawrhsap hoin nimin khan DC conference hall-ah an ṭhukhawm. Fire Prevention Week chungchang an sawiho a; week hman hun tur chungchangah state level committee-in a ruahman ruala neih ve an rel.

Duhsakna hlan

Mizoram Underground Returnee Association chuan thuchhuah siamin, Mizoram Assembly inthlanpui tluang taka neih a ni chu lawmawm an tih thu an tarlang a; ZPM party-in sorkarna an siam thei chu lawmawm an tih thu sawiin, tluang taka sorkar kalpui turin duhsakna an hlan tih an tarlang bawk.

Hâlpuah khap

Serchhip DC chuan thupek chhuahin, Serchhip district-ah hâlpuah, hâlmawi, meithallàwn leh a kaihhnawih thilte lak luh, zawrh, hralh, hâl leh hman khap a nih thu a puang. Bawrhsap chuan, halpuah leh halmawite chu hriselna tichhe thei, boruak tibawlhhlawhtu leh ri bengchheng siamtu a nih thu a tarlang.

Truck chesualah thi

Tuichawng bulah truck MZ-01 K-4345 a chesual tih nimin chawhnu khan hriat chhuah a ni a, ruck khalhtu Ramdinthara (20), Serchhip a thi. Thu dawn danin, truck hi company ta a ni a, a awmna chin hriat a nih loh avangin nimin chawhnu khan ngaihven niin, kawng thlang metre 20 velah hmuh a ni a; chetsual hun tak hriat a ni lo a, December 6, Nilaini zan emaw, nimin zing lam emaw a nih rin a ni.