Armed Force Flag Day pualin Larsapin thuchah a tichhuak

Nimin December 7 kha Armed Force Flag Day a ni a, he ni pual hian sipaite'n an kalsan tâk an chhungte tan vehbûr khawn a nih bakah, Governor Dr Hari Babu Kambhampati chuan thuchah a tichhuak.

Governor chuan, Armed Forces Flag Day-ah ram tana nunna hlantu sipai huaisen inpekna ropui tak kha hre thar leh turin mipui a sáwm a, "Sipaite hi kan ram vengtu dik tak, remna leh muanna min petu leh kan ram inrelbawlna leh thuneihna humhimtu an ni. Khua leh tui ṭha kan nihna angin kan tana inpe kan sipai huaisente duhsakna lantira thil pek pe turin kan inngen. Armed Forces Flag Day-ah hian sipai bángte leh an chhungte hamṭhatna leh inenkawlna atan thawhlawm kan thawh ṭhin a ni," a ti.

Tunlaiin khawvel hmun hrang hrangah buaina a pung mek tih sawiin Larsap chuan, sipaite hlutna leh pawimawhnate hriat thar a pawimawh tak zet thu a sawi a, "Kum danga kan tih ṭhin ang bawkin kuminah pawh hian thawhlawm kan khawn leh mek a ni," a ti a; pawisa hmuh chhuahte chu sipai bángte mamawh leh an thihsan, hmeithai leh an fanaute ṭanpui nan hman vek ṭhin a nih thu a sawi.

Dr Hari Babu Kambhampati chuan, sipai leh an chhungte hamṭhatna atan ṭhahnemngai taka thawhlawm thawh turin mi tin a ngen a ni.

Sainik Welfare & Resettlement hmalaknain nimin khan Armed Force Flag Day pualin vehbûr khawn a ni a, sorkar official hrang hrangte aṭangin Rs 21,060 an hmu. District Sainik Welfare Office palite'n Armed Forces Flag Day material lapel badge leh sticker sorkar department hrang hranga chansak tura an sem aṭangin sum eng emaw zat hmuh belh tura beisei a ni bawk.