Mizo kûtte ṭha zawka hman a nih theih nan Synod-in hmalak an rêl

Mission Veng Kohhran biak-ina Synod Inkhawmpui neih mekah nimin khan rorel chhunzawm a ni a, Mizote'n kûtpui an hman ṭhinte ṭha zawka hman a nih theihna tura hmalak rawtna an pawm.

Synod rorel hi moderator Rev. R Vanlalnghaka kaihhruaiin neih a ni a; Kolasib Presbytery aṭanga lut, 'Mizoin kûtpui kan hman ṭhin ṭha zawka hman' rawtna chu an pawm a, Synod Executive Committee (SEC)-in a ṭul anga a bawhzui turin an dah.

Skill development (kut themthiamna tihhmasawn) chungchangah ṭhalaite tana hmalak dan tur kawng zawn rawtna Aizawl Chhimthlang Presbytery aṭanga lut chu hmalak mekna a nih thu sawifiah a nih rualin, ṭha zawka chhunzawm zel ni se, an ti.

Synod-in a pawm tâk loh zingah Uniform Civil Code (UCC) leh Mizoram Christian University din rawtna a tel. Aizawl Central Presbytery aṭanga lut, UCC hman ve loh rawtna chu, hmalak mekna a ni tih inhrilhfiah niin, sawihona an duhtâwk a; Mizoram Christian University din a nih theih nana kawng zawn rawtna, Aizawl Hmar Presbytery-in an thlen chu hmalak mekna a ni tih an inhrilhfiah bawk.

Synod inkhawmpui rorel hi vawiin leh naktukah chhunzawm leh a ni dawn. Mission Veng Kohhran chuan kumin hi Synod vawi 100-na leh an kohhran kum 125-na a nih avangin vawiin tlai hian Synod palai zawng zawng tan ruai an buatsaih dawn a ni.