Kumin chhungin Aizawl dist-ah thubuai 2,238 ziah luh a ni tawh

Nimin khan IGP (Law & Order) Neichungnunga hoin Aizawl District Crime Review Meeting neih a ni a, kuminah November 30 thlengin thubuai 2,238 ziah luh a ni tawh tih tarlan a ni.

Ṭhutkhawmah hian kum 2023 chhunga special report case (sensational case) leh district chhunga case register chungchanga hmalakna leh hmalak zui dan turte sawiho a ni. Tarlan danin, kuminah November 30 thlengin thubuai 2,238 ziah luh a ni tawh a, chu'ng zinga thubuai 920-ah chuan chhui chianna report (chargesheet) court-ah thehluh a ni tawh.

Krismas leh kum thar thleng tur mipuiin hlim leh ralmuang taka an hman theihna tura sorkarin khapna thupek a chhuahte ṭha taka zawm a nih theih nan police officer zawng zawngte a ṭul anga inbuatsaiha ṭan la ṭheuh tura chah an ni.