Larsapin CM atan Duhoma a la lut: Minister atan mi 11 lak luh nghal a ni

Governor Dr Hari Babu Kambhampati chuan nimin khan Raj Bhavan-ah chief minister atan Lalduhoma a la lut a, chumi hnuah Chief Minister-in minister tura a ruat mi 11-te a la lut leh bawk.

Sorkar thar lak luh inkhawm hi chief secretary Dr Renu Sharma-i'n a kaihruai a, Governor chuan rinawmna thu tiamtirin chief minister atan Lalduhoma a la lut. CM lak luh hnuah Larsap chuan cabinet minister atan mi pasarih leh minister of state atan mi palite rinawmna thu tiamtirin a la lut leh a ni.

CM leh minister lak luh a nih zawhah protem speaker atana thlan Lalfamkima chu rinawmna thu tiam tira lak luh ve leh a ni.

Cabinet minister atana lak luhte chu - K Sapdanga, Vanlalhlana, Lalthansanga, C Lalsawivunga, Dr Vanlalthlana, PC Vanlalruata leh Lalrinpuii te an ni a; minister of state atana lak luhte chu - F Rodingliana, B Lalchhanzova, Prof. Lalnilawma leh Lalnghinglova Hmar te an ni.

Sorkar thar lak luh inkhawmah hian chief minister hlui pahnih Lal Thanhawla leh Zoramthanga te, MLA te, sorkar official-te leh sàwm bik eng emaw zat an tel a; Mizoram Synod Choir-in 'Ro min relsak ang che' tih hla an rem bawk.