Home Minister-in airport-a VIP kalphung a ngaimawh

Home minister K Sapdanga chuan, VIP leh VIP lo chungchanga Lengpui Airport-a inthliarna a awm chu chinfel a tum thu leh, receipt awm lo chia ramria pawisa inlaksakna awm ṭhin chu bo se a duh thu a sawi.

Nimina Aizawl Press Club-a chanchinbumite nen an inkawm­khawmnaah K Sapdanga chuan, Mizorama VIP tam lutuk chu tihtlem ṭhaa a hriat thu a sawi a, "Airport-ah a páwn lam thlenga VIP leh VIP lo inthliarna awm khu ka rilruah a awm em em a, a hranpaa chêt ngai loa an lo chinfel ka duh hle a ni," a ti a; terminal building kawtah VIP-te lirthei chauh luh phal a ni chu ṭha lo a tih thu leh damlote tan harsatna thlentu a nih thu a sawi a ni.

K Sapdanga chuan, state ramri kâna lirthei tlante aṭanga sum lâk awm ṭhin nia sawi a awm thu sawiin, "Heng hian ram hmél a tibâl. Chhiah lak ṭhin pangngai chu a awm ngei mai a, chumi piah lama receipt tel lo chi sum inlâksakna ang chi hi vawiin aṭangin bo se ka duh tak zet a ni," a ti.