CM-in ni 100 chhunga tih tur a puang; "Eirûkna i do tlâng ang u" - Lalduhoma

Chief minister Lalduhoma chuan CM atana nimina lak luh a nih zawhah Raj Bhavan Durbar Hall-ah thuthar thehdarhtute kâwmin, ni 100 chhunga a kaihhruai sorkar tih turte a puang a; eirûkna do turin mipui a sáwm.

CM Lalduhoma chuan, Mizoram sum dinhmun a chhiat tak zet thu sawiin, "Kan sum dinhmun a chhe em em a, pûk chawpin kan kal ṭawng ṭawng a ni. Thla khatah hlawh atan cheng vbc. 400 vel a kal a ngai a, a bâng a tlem hle. RBI-in warning a rawn pe hial. Budget ningnawi mai ring rih tur kan ni," a ti.

Kum khat chhung chu state sum sawhngheh kum atan an hmang phawt dawn tih sawiin Duhoma chuan, "Kum khat chhung hi chu mipuiin kan dinhmun siamṭhatna atan min pe se kan duh. Project liante kan ti rum rum thei dawn rih lo," a ti.

Lalduhoma chuan budget ningnawi ring rih mah se, kut hnathawktute an ngaih pawimawh dawn thu sawiin, "Sawhthing, aieng, hmarcha leh hmunphiahte kan rate bituk angin kan lei dawn a, bawhzui nghal a ni dawn," a ti a, budget tam lo mah se, a ningnawi aṭangin an ti thei dawna an hriat thu a sawi.

Chief Minister sawi danin, sorkarin rate a bituk anga sawhthing, aieng, hmarcha leh hmunphiahte hralh theih a ni dawn a, a aia toa hralhna an hriat erawh chuan sorkar a inrawlh kher dawn lo.

Sorkar hnathawkte thawhpuina tel loin sorkar a kal thei lo tih an hriat chian thu sawiin Lalduhoma chuan, "NGO leh kohhrante ṭawiawmna kan ngen. Eirukna kawngah an tih theih an ti a, thuneihna an kutah a awm lo. Min finchhuahtu, ṭawngtaisaktu atan ṭangkai tak tur an ni. Eirukna hi kan zavaiin i do tlâng ang u," a ti.

Chief Minister chuan, chhung khat hnai leh ṭhian ṭhate chu tun hmain sorkar hotute kawng dik lo zawhtirtu an ni mai theih tih sawiin, "Tun ṭumah chuan eiru lo tura min puitu, min vengtu leh min ṭawngṭaisak turin kan ngen," a ti a, official leh party worker-te pawh eiru lo tura puitu nih tum turin a chah.

ZPM sorkar tharin an bul ṭanna atan Isua thusawi, 'Kal la tisual leh tawh suh' tih chu an vawng reng tih sawiin Duhoma chuan, "Tun hmaa thil kal tawh inchhui vak vak kan rilruah a awm lo. Tun aṭang chuan dik taka thil tih tur a ni," a ti a, diknaa rorel inṭan hnua thil tisual lehte chungah erawh an khauh dawn thu a sawi.

Kumin November thla kha budget buatsaih hun a nih tawh thu sawiin Lalduhoma chuan, "Kan tlai ṭêp. Mahse, minister tinin department an enkawl dan tur road map kan nei vek. A tlachawp ni loin policy duan sa hmangin an department an enkawl dawn," a ti.

Chief Minister chuan, an manifesto chu an tlin chhan a nih thu sawiin, "Kan manifesto-te hlawhtling se an duh avangin mipuiin min vote tling a ni," a ti a; department tinin an minister-te kaih-hruaina ngai pawimawh a, ZPM policy tinzawn budget an siam an beisei thu a sawi.