Minister pathumin Press Club an tlawh
Minister lâk luh tâkte zinga pathum - K Sapdanga, Dr Vanlalthlana leh Lalnghinglova Hmar-te chuan nimin khan Aizawl Press Club an tlawh a, chanchinbumite nen inkawmin, thingpui an inho.
Inkawmhona hi MJA Gen.Hqrs president C Lalrambuatsaiha'n a kaihruai a; kum 2006-2010 chhunga MJA president leh Home minister thar K Sapdanga chuan, media chu minister a nihna kawng sialtu a nih thu a sawi a, ram hruaitu ni tura nawr luttu chu media a nih avangin amah ṭawiawma thláwp tur leh finchhuah turin chanchinbumite a sawm.
IPR minister Dr Vanlalthlana chuan, chanchinbu khawvelah a mikhual loh thu leh a theih leh phâk ang tâwkah media lamah a inhman ve tawh ṭhin thu a sawi a, MJA member-te nen ṭha taka an thawhho a beisei thu a sawi.
Minister of state Lalnghinglova Hmar pawhin thu sawiin, a tih dik loh hrilh hreh lo a, a ṭul anga thuràwn pe tur leh finchhuah turin MJA member-te a sáwm a ni.
Inkawmhonaah hian IPR director C Lalnunkima leh officer dangte pawh an tel a; minister pathumin lak luh an nih nía an in an pan hmaa Aizawl Press Club an tlawh nghal chu lawmawm an tih thu MJA chuan a tarlang.