Tuirini lui tihbawlhhlawh avangin Hot mix plant titàwp turin hriattir

Mizoram Pollution Control Board (MPCB) chuan kawng siamtu GVV (P) Limited hotute chu an hot mix plant titàwp nghal tur leh an hot mix plant-in lui tui a tihbawlhhlawhte a rang thei ang bera thian fai turin an hriattir.

MPCB tarlan danin, Thingsulthliah rama Tuirini luiah tun hnaia ruahsur laiin nasa takin bawlhhlawh a luang lut tih hriat a ni a, social media-a thlalak lo hmutute pawh a tibuai hle tih hriat a ni bawk a; hei vang hian December 6 & 7, 2023 khan MPCB-a thawkte'n a hmunah an enfiah nghal a ni.

Tuirini lui bawlhhlawh chhan chu NHIDCL hnuaia contractor pakhat, GVV (P) Limited ho hot mix plant aṭanga bawlhhlawh chhuak vang a ni tih hmuhchhuah a nih thu sawiin MPCB chuan, "Hot mix plant aṭanga bawlhhlawh luang thla chu a bula lui tê-ah a luang lut a, chu lui tê chuan a thlangah Tuirini lui a fin avangin Tuirini lui hi a tibawlhhlawh ta a ni," an ti.

MPCB chuan December 7, Ningani khan GVV (P) Limited hotute chu an hot mix plant titàwp nghal tur leh a rang thei ang bera tui tihbawlhhlawh chu thian fai nghal turin an hriattir a; an hmalak dan chu kár khat chhungin MPCB-ah thehlut turin an hriattir bawk.