CM-in ruihhlo vanga buaite enkawlna a tlawh

Chief minister Lalduhoma chuan nimina Mizoram chief minister mawhphurhna a lak hnuah Sakawrtuichhuna Ṭawngṭai Bethel Camping Centre (ṬBCC) a tlawh a, zu leh ruihhlo laka ṭhalaite humhim an nih theih nan sorkarin theihtawp a chhuah dawn thu a sawi.

Lalduhoma chuan, an sorkar huna tih tur pawimawh an duante zinga pakhat chu 'Ram rorelnaah Pathian ram lo thleng rawh se' tih a nih thu sawiin, "Pathian lal ram lo thleng tur dîpdâltu lian tak chu ruihhlo a ni. Ṭhalai leh pavalai thihna kan ramin a tuar nasa a, a chhan lian ber chu zu leh ruihhlo a ni. CM atana lak luh ka nih hnua mahni in pawh tlawh loa he hmun ka tlawh chhan chu, he Centre leh a anpui kan rama inenkawlnate kan ngaih pawimawh vang a ni a, zu leh ruihhlo laka kan ṭhalaite humhim an nih theih nan sorkarin theihtawp a chhuah dawn," a ti.

Home, jail leh centre-te chu eizawnna leh thiamna hlu tak tak hmuh theihna hmun atan buatsaih a pawimawh thu sawiin Duhoma chuan, "Hengte hi sual laka fihlim nan chauha hmang loin, kan fihlim tawh hnua eizawnna leh thiamna hlu tak tak hmuh theihna hmun atana buatsaih a pawimawh," a ti a, centre-a thawktute leh sorkar an ṭanho zel a ṭul thu sawiin, Krismas leh kum thar hlim taka hmang turin duhsakna a hlàn.

ṬBCC-ah hian ruihhlo vanga harsatna tâwk mi 860 enkawl mek a ni a; Chief Minister-in a tlawhnaah hian Social Welfare & Tribal Affairs secretary KT Beicho leh director Dr Lalhriatzuali Ralte ten an ṭawiawm. Director-in ṭanpuina atan Rs 50,000 a hlan a ni.