Kan tho chhuak leh ngei dawn - Tawnluia

MNF senior vice president Tawnluia chuan, Mizoram inthlanpui result chu an tana ṭha tura Pathian remruat a ni tih an pawm thu leh Pathian kaihhruainain an thawh chhuah leh ngei dawn thu a sawi.

Nimina Mizo Hnam Rûna inkhawmah Tawnluia chuan, "Pathian kaihhruainain kan lêt leh ngei dawn. Tun inthlan result hi kan ṭhatna tur zawka Pathian remruat a ni tih kan pawm. ZPM-te kan lawmpui a, duhsakna kan hlan. Kan MLA 10-te hi constructive opposition an ni dawn. Enchhin sorkar hi mipuiin kan chîk dawn a, kan thlir uluk hle ang. Kan inenchhin hun hi a rei dawn lo," a ti.

Tawnluia chuan, MNF chu kum 1963-ah political party chak ber an ni tawh nia sawiin, "Pathian hruaina vangin sorkarna kan siam fo tawh. Kan lung a chhia a, kan mittui a tla ṭhin a, kan lawm a, kan hlim fo tawh ṭhin. Tunah pawh kan thinrim lo a, kan lungawi lo hek lo. Hmâna min pek ang sorkarna Lalpa'n min pe leh mai dawn," a ti a; Pathianin MNF a hruai tawhna zawng zawngah an lawm thu a sawi.

Tun inthlana an chak lohna chuan thahrui thar a pe dawn nia sawiin Tawnluia chua, "Unit aṭanga General Headquarters thlengin kan insiamṭha dawn a, kan nguai reng dawn lo. Kan vote hmuh pawh a tlem lo a, kan tho leh thuai dawn. MNF pianna chu Mizo nationalism a ni a, kan auhla ber tur a ni reng ang. Ṭawngṭaina nen kan bei zel dawn a ni," a ti.

Tawnluia chuan, "MNF sorkar hi hna thawk lo anga min puh chungchang hi a taka hretu chu mipui an ni. Covid-in kan hnathawh min tibahlah hle a, hmasawnna hna kan tum angin kan thawk thei lo. Chutih rualin, engmah thawk lo anga min puh duh tlat maite kha a dik bik lo. Hma thar lain, hnathawk peih, mi taima leh rinawm ṭhahnem tak kan la awm a, kan tho chhuak leh ngei dawn," a ti bawk.