MCU-in Annual General Meeting an nei

Mizoram Consumers' Union (MCU) chuan nimin khan Central YMA Hall-ah Annual General Meeting vawi 26-na an hmang a, minister Dr Vanlalthlana, MCU adviser ni bawkin a hmanpui.

Dr Vanlalthlana chuan, MCU chu mipui dikna leh chanvo humhalha venghimtu a nih thu sawiin, "Consumer-te tan thawk zel u la, headquarters leh branch tinte in pawimawh dan a inchen vek. Vawiina hnathawh hi kan hma lam huna Zo fate tana kawng kan sialna a ni tih hre reng ila, consumer-te dikna leh chanvo humhim nan theihtawp chhuah zel ang u," a ti a, MCU hmalaknate a ṭul anga thlàwp zel a tum thu a sawi.

Food, Civil Supplies & Consumer Affairs joint director Lalmuansanga Ralte pawhin thu sawiin, consumer forum leh activist-te chu mipui náwlpui tana ding, an dikna chanvo humhalhsaktu tura din an nih thu a sawi a, "Mizoram dung tluanah consumer rights awareness hi kan nei ṭha ve thawkhat tawh a, mahse, hriatna ringawt chuan consumer rights kenkawh kawngah hmasawnna duh angin min la thlen tawk lo. Consumer-te an huaisen zual zel theih nan consumer activist-te'n theihtawp an chhuah a ngai," a ti.

MCU Annual General Meeting hi an vice president Thanglura'n a kaihruai a, chawhnuah MCU president Prof. Chawngsailova kaih-hruaiin rorel a ni.