Mizoram Presbyterian Kohhran Inkhawm tihtlêm a ni dawn lo

Synod inkhawmpui neih mek chuan Mizoram Pres­byterian Kohhran inkhawm tihtlem a ni dawn lo tih nimin khan a tichiang a; contract hna hralh chung­changah hmalak an rêl.

Synod inkhawmpui hi nimin khan Mission Veng Kohhran biak-inah chhunzawm a ni a, moderator Rev. R Vanlalnghaka'n a kaihruai. Inkhawm tihtlem chungchangah, "Inkhawm tih­tlêm chungchanga zir­chianna leh presbytery ngaihdan khaikhawmna ngaih­thlak a ni a, zir chiangtute rawtna siam leh presbytery ngaihdan angin kan kal dan ngaia kal hi kan tih tur a ni e," an ti.

Mizoram Presbyterian Kohhran inkhawm tihtlem rawtna hi kum hmasa lama Synod inkhawmpuiin Synod Executive Committee bawhzui turin a lo pawm tawh a, SEC chuan a bawhzui a ni. Zir chiangtu tur din a nih bakah, kumin 2023-a presbytery inkhawmpuiah ngaihtuah turin dah a ni a, presbytery tam berin inkhawm tihtlem ṭul an ti lo. Zirchianna leh presbytery ngaihdan chu Synod inkhawmpuiah hian ngaihthlak a ni a, inkhawm tihtlem duh lo an tam zawk avangin inkhawm titlem lo turin thutlukna an siam ta a ni.

Contract hna hralh a awm lohna tura hmalak rawna a lut a, 'Kohhran duh loh zawng a ni,' tiin Synod inkhawmpui chuan a pawm a, SEC bawhzui turin an dah.

Chhungkaw harsate khai chhuak záwnga tun aia nasaa hmalak rawtna pawh pawmin, 'SEC-in chak zawkin hma lo la rawh se,' an ti bawk.

NIMINA SYNOD ROREL DANG ṬHENKHAT

▶ Anpui inkawp (same sex marriage) a bo theihna tura hmalak rawtna chung­changah, 'Synod hmalak mekna a ni a, kohhran tinah hmalak chhunzawm zel ni rawh se,' an ti.

▶ Lehkhabu ṭha chhiara hma kan sâwn theih nana hmalak an pawm a, SEC-in a ṭul anga an bawhzui turin an dah.

▶ Fa lâk (adoption) chungchanga zirtirna siam rawtna an pawm a, SEC bawhzui turin an dah.

▶ Chhungkaw kehchhia an pun zel loh nan hmalak rawtna ṭha an ti a, SEC-in hma lo la rawh se, tih a ni.

▶ Mizo Kristian léngkhâwm hlate audio-a dahṭhatna siam rawtna an pawm a, SEC-in a bawhzui turin an dah.