HSS Games-ah Mizo HSS an thiam ber
Mizoram Higher Secondary School Games vawi 20-na chu nimin khan Pachhunga University Multipurpose Auditorium-ah khâr a ni a, School Education secretary Dr Lalzirmawia Chhangte-in a hmanpui. Games-ah hian Mizo Higher Secondary School pakhatna an ni.
HSS Games hi December 4-8, 2023 chhungin khelmual leh hall hrang hrangah neih a ni a, Aizawl pawna zirlai leh zirtirtu 442 leh Aizawl khawpuia zirlai leh zirtirtu 702 an tel a, an vaiin mi 1,144 an tel. Athletics, badminton, basketball, football, table tennis leh volleyball-ahte zirlaite an intihsiak a ni.
Intihsiakah hian medal 17 latu Mizo HSS pakhatna an ni a, gold medal pakua, silver pahnih leh bronze paruk an la a ni. Malsawmtluanga, GM HSS, Champhai leh Lalpianmawii, Mamit HSS-te chu best athlete an ni a, gold medal leh silver medal pakhat ve ve an la.
Dr Lalzirmawia Chhangte chuan, infiamna chu zirna huangah a pawimawh tih sawiin, "Infiamna hi thawhhona a nih angin a huhoa infiamna aṭang hian sikul naupangte'n an puitlin chhohnaah a huhoa hnathawh dan leh mi dangte nena lungrual taka thawhho dante an thiam phah a, naupangte theihna hai chhuahna ṭangkai leh eizawnna lamah pawh hma êng an neih theihna tura kawng hawngtu a ni," a ti. Zirlaite chu zirna tibahlah lo zawnga zirna leh infiamna kalkawptir thiam turin a chah bawk.