KHAWTHLIR

Thisen pe

HDFC Bank, Aizawl chuan nimin khan Civil Hospital, Aizawl blood bank-ah thisen unit 25 an pe a, petute mipa 23 leh hmeichhia pahnih an ni a; HDFC Bank, Kolasib pawhin Kolasib District Hospital-ah unit 18 an pe a, petute mipa leh hmeichhia pariat ve ve an ni. Serchhipa Brilliant Higher Secondary School zirlaite pawhin Serchhip District Hospital tan thisen unit 26 an pe a, petute mipa 16 leh hmeichhia 10 an ni.

Assembly session

Governor Dr Hari Babu Kambhampati chuan Mizoram Legislative Assembly pakuana ṭhutkhawm vawi khatna chu December 12, 2023 chawhma dar 10:30 aṭanga neih turin a ko.

Raj Bhavan hawng dawn

Kumin Krismas leh 2024 kum thar pualin Governor chenna, Raj Bhavan chu December 24-26, 2023 leh January 1-3, 2024 chhung mipui tlawh theih tura hawn a ni dawn. Raj Bhavan tlawh turte tan chawhma dar 10 aṭanga tlai dar 4 inkarah hawn a ni ang.

Horticulture Fair

Khawzawl district Horticulture pisa bultumin nimin khan Khawzawl Dinthar Vengah Horticulture Fair-cum-Exhibition buatsaih a ni a, DAO Vanlalruata Hnamte-in a hawng. Fair-cum-Exhibition ah hian pangpar, thei leh thlaiah mi 79 intihsiakin lawmman sem nghal a ni a; loneitute thar chhuah thlai leh theite man tlawm zawkin zawrh a ni bawk.

Ngopa Block pahnihna

NITI Aayog-in Aspirational Block Program (ABP) 2023 Delta ranking a tihchhuahah Ngopa RD Block chuan Zone-1, Hilly and North Eastern areas-ah lawmman pahnihna a dawng. Lawmman hian cheng nuai 100 a keng. ABP hi NITI Aayog hmalakna a ni a, India ram pumah RD block hmasawn ngai zual thlan chhuah bik 500-ah hmasawnna chak zawka kalpui tumna atana ruahman a ni. Block-te chu an awmna hmun a zirin zone parukah ṭhen an ni a, zone tin aṭanga block pahnihte chu ranking pek an ni. Zone 1-ah tlang ram leh hmarchhak state bakah, thliarkar hote an tel a; Zone-1 a pakhatna chu Amri block, West Karbi Anglong, Assam a ni.