Synod inkhawmpui-in sakramen atan Mizo grape tui hman rawtna a hnâwl

Synod Inkhawmpui vawi 100-na chuan Mizorama grep thar chhuah aṭanga siam wine (grape wine) sakramen atana hman rawtna a hnâwl. Nimin khan pastor 18 nemngheh a nih bakah, probationary pastor 18 dahngheh an ni a, nizan khan inkhawmpui a ṭiak.

Synod Inkhawmpui hi December 5, 2023 zan khan Mission Veng Kohhran biak-inah ṭan a ni a, Mission Veng Pastor Bialin an thleng. November 6-9 chhung khan chhun lamah rorel a ni a, Inrinni chhun/tlaiah rorel zawh hman a nih loh avangin Inrinni zan inkhawm bànah rorel chhunawm niin, zan dar 9:30 velah zawh a ni.

Inkhawmpui rorelah hian Inrinni khan Mizorama thar grape sàwr tui (grape wine) sakramen atana hman chungchang ngaihtuah a ni a, ruahmannate ngaihthlak a nih hnuah hnâwl a ni a, tuna an hman mek ang hman chhunzawm zel rèl a ni.

Rorelnaa tarlan danin, kum 2022-a Synod inkhawmpui vawi 99-na chuan Mizorama grape thar aṭanga siam grape tuite sacramental wine atana hman rawtna chu Synod Executive Committee (SEC) zir chian tur leh Synod inkhawmpui leh huna ngaihtuah atan thlen leh turin a dah.

SEC chuan Synod Officers Meeting (OM) zir chian turin a dah a, OM-in an zir chian hnuah SEC-ah an thlen a; SEC chuan chipchiar zawka zir chiang leh turin OM kutah a dah leh a, OM chuan an zir chianna chu SEC-ah a thlen leh a, SEC chuan Synod inkhawmpuia ngaihtuah turin a thlen leh chhâwng a ni.

Synod chuan Mizorama kohhran hrang hrangte intel khawmna tur pawl thar, Council of Churches in Mizoram (CCM) din tuma hmalak meknaa a kalphung leh ruangám duante a pawm a, a ṭul angte SEC bawhzui turin an dah.

CCM din tur hian Mizorama kohhran pawl hrang hrang hmunpuia hruaitute an lo inhmukhawm tawh ṭhin a; CCM a din chhan tura tarlante chu - Mizorama kohhrante inpumkhata awm te, chanchin ṭha hril kawngah inrem tlâng taka thawhho te, ram leh khawtlang siamṭhatna tura thawhhote a ni. Kalphung leh ruangám an ruahman dan chuan, CCM-ah hian member 1,000 nei chin kohhrante an tel thei ang.

Synod inkhawmpui chuan kum 2024-25 chhunga Mizoram Synod budget (estimate) atan Rs 4,97,58,62,000 an pawm bawk.

Synod inkhawmpuiah hian nimin chawhma khan moderator Rev. R Vanlalnghaka'n pro. pastor 18 chu pastor atan a nemnghet a, pro. pastor atana lak thar mi 18 a dahnghet. Chawhnu inkhawmah Moderator-in Lalpa Zanriah Sakramen a ṭheh a, nikum Synod leh kumin Synod inkara thi pastor pahnih sûnna hun hman a ni. Zan inkhawmah moderator kal chhuak Rev. Dr C Chawnghmingliana'n thuchah a sawi.

Synod vawi 100-naah hian palai 2,128 an kal a, palai ni sa 1,287, palai thlan 801, fraternal delegate 25 leh palai intirh tawn mi 15 an ni. Palai zinga 1,158 chu Aizawlah an riak a, Mission Veng Bial chhunga riak lut mi 859 an awm.

Fraternal delegate-te chu Presbyterian Church of India hnuaia Synod dang aṭanga kalte an ni a, palai intirh tawnnaah hian Mizorama kohhran páwl dang - Baptist Church of Mizoram, LIKBK leh Evangelical Church of Maraland aṭangin palai pahnih ṭheuh an tel a; Presbyterian Church of Wales aṭangin moderator Rev. Aneurin Owen (Zolawma) pawh a tel a ni.