CM Duhoma'n CMO a luah lut

Mizoram Chief minister atana December 8, 2023-a lak luh tâk Lalduhoma chuan December 9, Inrinni khan Chief Minister's Office (CMO) a luah ṭan. Vawiin hian minister dangte pawhin an pisa ṭheuh an luah lut ṭan dawn nia thu dawn a ni.

CM Lalduhoma'n a CMO a luah ṭan pual hian CM Conference Hall-ah inkhawm tâwi buatsaih a ni a; cabinet minister leh minister of state te, Mizoram Kohhran Hruaitute Committee leh Mizoram People's Forum office bearer te, CMO-a thawkte leh CM nupui fanaute an tel. MPF general secretary Rev. Lalramliana Pachuau-in hunserh a hmang a ni.

CMO a luah ṭan nía kohhran hruaitute a sàwm chhan sawiin Lalduhoma chuan, "Pathian leh mipui zarah sorkarna kan han kalpui dawn ta a, ka bul ṭanna ní, office ka luah luh níah thlarau lama kan puithiamte'n min telpuiin, ṭawngṭainate min neihsak se kan duh a ni," a ti.

Lalduhoma chuan, "Inthlan hma leh inthlan zawh hnuah pawh kan thawhpui mi tam takte'n kan sawi fo chu, 'Kan sorkar chuan Pathian hnena lawmthu sawina, sual thupha chawina leh inhlan tharna i nei ang u' tih a ni," a ti a, Pathian awmpuina nen sorkarna kalpui an duh thu a sawi.

Chief Minister hian CM a nih anga file a khawih hmasak ber chu Information & Public Relations department aṭanga file kal a ni a, pisa a luah luh ní hian file-ah hming a ziak. CM Bangla a fang kual bawk.