Ropeway leh skywalk thubuai ACB-in an chhui nawn leh mek

Anti Corruption Bureau (ACB) chuan Chaltlang leh Durtlang inkara ropeway siam tur leh Sakawr-hmuituai tlanga skywalk siam tur chungchang an chhui nawn mek.

November 22, 2021 khan MNF Vigilance department leh Legal Board-te'n ropeway leh skywalk siam chung-changah Lokayukta-ah complaint an thehlut a, a hnu February 3, 2022-ah nodal department - Tourism department pawhin Loka­y­ukta-ah vêk complaint an thehlut ve leh a ni.

Lokayukta chuan complaint an dawn chu an zir chian hnuah chhui zui tlakah ngaiin, ACB-te chu chhui chiang turin an hriattir.

ACB chuan hun eng emaw chen an chhui hnuah October 2023 vel khan thubuai hi chhui zoin an report Lokayukta-ah an thehlut a ni.

Lokayukta aṭanga thu dawn danin, ACB chuan skywalk leh ropeway siam tur chungchangah hian thil dik lo awm ngeiin an hria a, thil dik lo tituah hna­thawktute an puh. Hetih lai hian, Mizoram sorkarah puh an nei lo thung.

Hei vang hian Loka­­yukta chuan ACB chhuina chu duhkhawp loin, chiang zawka chhui leh turin ACB a hriattir. ACB chuan thubuai hi an chhui leh mek a, an report Lokayukta-ah an la thehlut leh lo.

Lokayukta chuan ACB-in report an thehluh hunah zir chiangin, thubuai kalpui zel dan turah thu­tlukna an siam ang.

MNF-in Lokayukta-a complaint an thehluha an tarlan danin, Sakawr-hmuituia skywalk atan 10% mobilization advance tur cheng nuai 48.50 turah cheng nuai 287.25 pek chhuah a ni. Durtlang-Chaltlang ropeway atan mobilization advance zat tur cheng nuai 248.25 a nih laiin, cheng nuai 1,317.80 an pe chhuak bawk.