Krismas leh kumthar vuakvêtah Central YMA-in hma a la dawn

Mizoram sorkarin a ngen angin Central YMA chuan Krismas leh kumthar vuakvetah him leh thlamuang taka mipui an awm theihna atan hma a la dawn.

CYMA hian Mizoram sorkar ngen angin Krismas leh kumthar vuakvetah ruihhlo a zalen loh nan te, hâlpuah leh hâlmawite zawrh leh hman a nih loh nante leh, dan loa hnam dang sumdawng dap chhuah kawngahte hma a la dawn a; December 9, Inrinni zing khan CYMA Zawlbukah bul ṭanna hun an buatsaih.

Kumpuan Committee chairman Prof. Lalnuntluanga, CYMA vice president chuan, Krismas leh kumthar vuakvetah him leh thlamuang taka mipui an awm theih nan nasa zawka ruihhlo do a, hàlpuah leh hàlmawi chhiatna thlen theite hman a nih loh nan mahni huam chhung ṭheuha hma la turin YMA sub-headquarters leh branch-te a sáwm a ni.