HIV/AIDS enkawl dan zirho

Ministry of AYUSH hnuaia Clinical Research Unit for Homoeopathy, Aizawl Civil Hospital chuan nimin khan McCabe Hall, Aijal Club-ah HIV/AIDS leh homoeopathy hmanga enkawlna chungchang zirhona, '2-Days national level Continuing Medical Education (CME) on HIV/AIDS: The disease and it's Homoeopathic management' tih an buatsaih a; AYUSH deputy director Dr S Mara Thansiami'n a hmanpui.

Dr S Mara Thansiami chuan, HIV/AIDS chu mi tin tibuai theitu a nih avangin mipuiin an ngaihven a pawimawh thu sawiin, "He CME hi HIV/AIDS dona atan kan hlâwkpui ngei ka beisei a, homoeopathic doctor-te'n in thiamna hmangin theihtawp chhuah ang che u," tiin Ayush doctor-te a fuih. He programme hmanpui tur hian state páwn aṭangin homoeopathic researcher-te an tel a; Mizoram chhung leh páwna HIV/AIDS lam buaipuitu mithiamte'n thil pawimawhte an zirtir a ni.

Zirhonaa an tarlan danin, HIV/AIDS chungchangah homoeopathic research paper eng emaw zat tihchhuah a ni tawh a; randomised controlled trial pawh neih a ni tawh. Ni tina homoeopathic damdawi hman tlánglàwnte chu CD4 count tisang thei an ni tih hmuh chhuah a ni.