Kum kal mekah Kolasib district-ah TB vei mi 144 hmuh chhuak tawh

Sorkar kum kal mekah April-December chhungin Kolasib district-ah ngawr (TB) vei mi 144 hmuh chhuah a ni tawh a, TB vangin mi pathum an thi tawh.

Kolasib District Task Force on Immunisation (DTFI) leh Kolasib District TB (Tuberculosis) Forum hotute bawrhsap John LT Sanga hoa December 8, 2023-a DC conference hall-ah an ṭhukhawmnaa tarlan danin, kumin April-December chhungin rinhlelh khâk (sputum) endik 1,492 aṭangin TB vei mi 144 hmuh chhuah a ni a, TB leh HIV vei kawp mi 14 an awm. TB vei zinga 62 enkawl dam an ni tawh a, enkawl mek 82 an awm. TB vei zinga pathum chu an thi a ni.

Ṭhutkhawmah hian hri danna (vaccine) chungchanga hmalakna Intensified Mission Indradhanush 5.0 hnuaia hmalakna tarlan a ni a, kumin August-November chhungin Kolasib district-a sub-centre pali hnuaia hmun pakuaah naupang kum 5 hnuai lam leh nu nau paite hnenah hri danna pek beihpui thlak a ni.

Kolasib district-a naupang kum 1 hnuai lam vaccine pek tum 318 zinga 285 hnenah pek a ni a, kum 1-2 inkar pek tum mi 151 zinga 85 leh kum 2-5 inkar pek tum 120 zinga 54 pek a ni. Raipuar hri danna pek tura ruahman mi 94 a nih laiin, mi 119 hnenah pek a ni bawk.

December thla ral hmaa sentút (measles) leh sentút fáng/ ni thum sentût (rubella) natna ûm bo tura beihpui thlak mekah, kumin April-October inkar chhungin nausen thla 9-12 inkar measles-rubella (MR) vaccine pek tur target 854 zinga 820 (96.02%) hnenah MR1 vaccine pek a ni.

Kolasib district-a naupang thla 16 leh kum 5 inkar MR vaccine pek tur target 854 zinga 748 (87.59%) hnenah MR2 vaccine pek a ni a; MR ûm bo turin MR1 leh MR2-ah 95% ve ve phak a ngai.

Kolasib district-a naupang/tleirawl kum 10-16 inkarte tana sakawr-êk-hrik (tetanus) leh hrawk ná (diphtheria) hri danna, Td vaccine pek kalpui mekah April-October, 2023 chhungin Td10 1,065 (56%) leh Td16 899 (45%) pek a ni tawh. Tun dinhmunah Kolasib district-ah hri danna hmanga ven theih natna vei hriat chhuah leh nem ngheh (confirmed case) a awm rih lo.