Mizoram UPC General Assembly a ṭiak

December 8, 2023-a ṭan Mizoram UPC inkhawmpui lian ber General Assembly, Assembly Centre, Zonuama neih chu nizan khan a ṭiak. Zan lam leh Pathianniahte revival inkhawma hun hman a ni a, Zirtawpni leh Inrinniah niléngin rorel a ni.

Mizoram UPC General Assembly chuan kum 2024 Mizoram UPC budget atan Rs 29,32,02,332 an pawm a; ram pumah harh tharna a thlen theih nan ram pum huap chaw nghei ṭawngṭai leh kum 2024-ah bial tinah thuthlung lam hawi seminar neih an rél.

Ruihhlo ngaite puala ram pum huapa camping buatsaih te, kohhran ding thar ṭanpuina pek ṭhin tihsan te, district leh general huap inkhawmpui leh revival inkhawmahte Pathianni zan thawhlawm chu Foreign Missions puala dah te, assembly hall chak zawka sak a nih theih nana hmalakte an rel a; kohhran danpui khawih eng emaw zat an rel bawk.