CYMA-in Manipur-a Zo hnahthlak a ṭanpui

Central YMA chuan Manipur tualchhung buaina vanga harsatna tâwk relief camp-a awm mekte ṭanpuina tur a thawn a, chungte chu December 7, 2023 khan CYMA president Lalhmachhuana'n CYMA pisa kawt aṭangin a vailiam.

CYMA President chuan, Zo fate inpui leh Jerusalem chu Mizoram a nih thu sawiin, "A chhunga cheng Mizoram mipui hian hmun hrang hrang a kan unau Zo fate harsatna tawh hi kan hre reng a, kan theih ang angin kan tuamhlâwm zel dawn. Zo fate hian harsatna kan tawhte hi a ṭha zawnga inpumkhat zual nan kan hman a ṭul," a ti.

Myanmar, Manipur leh Bangladesh tualchhung buaina vanga Zo hnahthlak harsatna tâwkte ṭanpuina tur hian hmun hrang hrang aṭangin CYMA-ah ṭanpuina a lut ṭhin a, ṭanpuina lut tawh chu cheng nuai 236 chuang a tling tawh a, cheng nuai 167 chuang hman a ni tawh.

December 7, 2023-a CYMA-in Zo hnahthlakte ṭanpuina tura a thawnte chu buhfai ip 100, thawmhnaw lum leh mutbute a ni.