Sorkar sikulah zirtirtu post 6,106 zinga post 3,186 hnawhkhah a ni

Mizoram sorkar hnuaia primary school, middle school leh high school-ah zirtirtu awm tura ruahman (sanctioned post) 6,106 zinga post 3,186 chiah hnawhkhah a ni a; Lunglei district-ah zirtirtu indaih loh zualna sikul a tam ber.

RTI Act tlawhchhana zawhna School Education Directorate SPIO-in a chhan danin, November 1, 2023 dinhmun angin Mizoramah primary school zirtirtu post 2,469 a awm a, chu'ng zinga post 1,310 chu hnawhkhah a ni a, hnawhkhah loh post ruak 1,159 a awm.

SPIO-in primary school-a zirtirtu indaih loh zualna sikul 100 a tarlan zingah Lunglei district-a sikul 34 a awm a; Mamit district-a sikul 29 leh Champhai district-a sikul 18-te chu primary school-a zirtirtu indaih lo tamna zual a ni.

Middle school-a zirtirtu indaih loh zualna sikul pasarih tarlan zinga pathum chu Lunglei district-a mi a ni a; high school-a zirtirtu indaih loh zualna 10 zinga pali chu Siaha district-a mi a ni.