H/S Quiz-ah St. Paul's an thiam ber

Mizo Zirlai Pawl (MZP) General Headquarters leh Aizawl Smart City Ltd chuan Ignite Studio, Aizawlah MZP Inter High School Quiz 2023 an buatsaih a, December 9, 2023 zan khan zawh niin, St Paul's Higher Secondary School pakhatna an ni.

Inter High School Quiz-ah hian sikul 13 aṭangin high school zirlaite an tel a, December 8 zan khan final-ah St Joseph HSS, St Pauls HSS leh CLS Academy-te an intihsiak. St Pauls HSS aiawha tel Malsawmkima leh Vanlalmuanpuii te pakhatna an ni a; St Joseph HSS aṭanga tel Vanlalenkawli leh H Lalsangpuia te pahnihna niin, CLS Academy aiawha tel Lalawmawii Ralte leh Lalrinruali Ralte te pathumna an ni.

Pakhatnain Rs 30,000 an dawng a, pahnihnain Rs 20,000 leh pathumnain Rs 10,000 an dawng a, thuchei leh nomawi an dawng tel.

Inter H/S Quiz khârnaah hian MZP president hlui Lalmuanpuia Punte, MLA khuallian a ni a, Mizote central service-a lut thei tura an inzirtir nasat a ngaih thu a sawi. MZP hruaitute'n demna tam tak an tâwk ṭhin tih sawiin, academic session-a zirlai ni mekte tan pawl hruai ngaihna awm loh thu a sawi bawk.