KHAWTHLIR

Thisen pe

KṬP, Zemabawk Branch chuan nimin khan an kohhran hall-ah thisen pek rûnpui an huaihawt a, Synod Hospital tan thisen unit 40 an pe a, mipa 37 leh hmeichhia pathum an ni. ṬKP, Thingkah Unit pawhin Lawngtlai District Hospital tan thisen unit 19 an pe a, petute mipa 13 leh hmeichhia paruk an ni.

EFCI-in hmeichhe inkhawmpui hmang

Evangelical Free Church of India (EFCI), Mizoram Regional Kristian Hmeichhe Pawl chuan December 8-10, 2023 chhung khan Sakawrdaiah inkhawmpui vawi ngana an hmang a, thupui chu 'Pathian thu a taka phurh chhuah' tih a ni. Inkhawmpuiah hian ro an rel a, resolution paruk an pawm. Kum 2023-2025 chhunga hruaitu tur an thlang a, chairperson atan Zosangzuali (Kolasib Presbytery) leh secretary atan Lalremkimi Hmar (Aizawl Presbytery)-te an thlang.

VBSY sawipui

Prime minister Narendra Modi chuan December 9, Inrinni khan India ram hmun hrang hranga Viksit Bharat Sankalp Yatra (VBSY) hamṭhatna dawngtute biak hmuhna (video conference) hmangin a kâwm. Inhawmhona hi Mizoram aṭangin Agriculture department bakah sorkar department dang hotu te, KVK Kolasib hotute leh loneitu thlan bik aiawhte'n an chhim. Viksit Bharat Sankalp Yatra-in a tum ber chu sorkar flagship programme hrang hranga hamṭhatnate a hun chhunga a dawngtu tur dik takin an dawn a, a takin an kalpui ngei a ni tih hriatpui a ni.

Tanpuina hlan

Lawngtlai Auto Rickshaw Owners Association chuan nimin khan December 6, 2023 a riangvaite puala charity service an neiha an pawisa hmuh Rs. 2,37,650 an sem chhuak ṭan a, Lawngtlaia damdawi-in pathum - District Hospital, Lairam Christian Medical Centre & Hospital leh Christian Hospital, Lawngtlai bakah Lairam Rescue Centre-ah Rs.10,000 ṭheuh an hlan a; Lairam Motherless Home-ah Rs. 22,150 an hlan bawk. Ṭanpuina hi la sem chhunzawm tur a ni.

Hmalakna thlirho

Kolasib District Task Force on Immunisation leh Kolasib District TB (Tuberculosis) Forum chu an chairman John LT Sanga, bawrhsap hoin December 8, 2023 khan DC conference hall-ah an ṭhukhawm a, hmalaknate leh hmachhawpte an sawiho. Hriselna lama hmalaknaa Kolasib district dinhmunte thlirho a ni bawk.

Tanpuina pe

Mosia Agency, Aizawl chuan Manipur buaina vanga harsatna tawk Zo hnahthlakte ṭanpuina atan tun hnai khan Central YMA-ah Rs 2,30,000 a pe. CYMA chuan Mosia Agency chunga an lawm thu thuchhuah siamin an tarlang.