MPL10 semifinal-ah Mizoram Police, Chanmari leh Chawnpui

A chung berah Chanmari FC

Laldampuia'n Chanmari FC a enkawl hnuah vawi hnih hnehna a chanpui a, Zote Toyota MPL10 table-ah a chung berah awmin semifinal lut turin an tling.

Zirtawpni zan khan RG Stadium-ah Chanmari FC-in MPL10 phase 2-a che ṭha tak FC Venghnuai an hmachhawn a, 3-0 in an sawp. Chanmarians tan Lalkhawpuimawia'n goal hmahruai a khung hnuah Laltlanzova leh Vincent Lalduhawma ten an khung.

Kelkang striker Mapuia hi Santosh Trophy group stage-ah India ram pumpuiah top scorer a ni a, amaherawhchu MPL10 phase 2-ah beisei a pha lo. Goal a khung theih loh avangin bench-a ṭhut ṭumte a nei hial. Venghnuai lakah erawh bul ṭanin goal hmahruai khung tur hian a thawh hlawk a, Zozoa nen an inthlawp hnuah goal ṭha zet a khung. Mapuia hi a vanneih ṭum ni se, goal hnih khung tur a ni a, offside vangin a goal khung hnuhnung zawk pawm a ni lo.

Mizoram winger Zozoa'n MPL10 match hmasa berah goal hnih khung nghal mah se round 12 thlengin goal a khung tawh lo. Season liam taa Chawnpui FC champion puitu winger Zozoa hian goal a khung leh ta a, inrintawkna a neih belh phah ang.

Chanmari coach Laldampuia chuan, "MPL match hnih ka enkawl a, kan chak ve ve hi ka lawm. Coach mawhphurhna ka chan khan match thuma vawi thum chak hi ka hmachhawp a ni a, Chhinga Veng pawh hneh leh ngei kan tum ang. Chutihrualin semifinal khelh hmaa chawlhna hun a awm loh avangin player ṭhenkhat erawh hahdamtir a ngaih ka ring," tiin Vanglaini a hrilh.

A tling hmasa ber Police

Zote Toyota MPL10-ah December 8, Zirtawpni zan khan Mizoram Police FC leh Chhinga Veng FC te goal awm loin an inhnehtawk. Lalbiaksanga Colney hoten point hlu tak an hlawhchhuah avangin panganaa awm Aizawl FC-in an umpha thei tawh lo a, semifinal lut tura tling hmasa ber an ni.

MPL10 round 1-ah club ṭha pahnih hi inhmachhawn tur an ni a, Chhingcows registration fel loh vangin Police chaka puan an ni. Hei vang hian round 13 hi an inhmachhawn vawi khatna a ni a, result-in nghawng lian tak a neih theih avangin inkhel pawh a nung hle.

Police-in defender pawimawh Lalrinzuala an chhawr thei lo a, Chhingcows-in goal khung theihna chance ṭha an ngah zawk. MS Dawngliana'n keeper F. Lalmuanawma chauh a hmachhawn hnuah a khung thei lo a, Mizoram keeper Muanawma hian PC Lallawmkima khung tur a dansak bakah Lallawmsanga (LS-a) goal khung tur chu Police midfielder R. Malsawmtluanga'n goalline aṭangin a pet chhuak bawk.

Police tawnhriat neih ṭhatna a lang a, goal chance ṭha bik nei chiah lo mah se Malsawmfela te an hlauhawm ve reng. Second half-ah BS-a Colney hoten Chhingcows goal nawr na zual an beng dai a, harsatna hranpa tawk loin an mamawh tawk point khat an hlawh chhuak.