KMMTTP zawh tlai chhanah engineer puh LADC-a Revenue dept. fimkhur turin duh

Committee on Estimates chuan Kaldan Multi Modal Transit Transport Project (KMMTTP) a hun taka zawh loh chhanah PWD engineer-te an puh a; chutih laiin, LADC hnuaia Revenue department chu LSC pek chhuah kawngah fimkhur tawh turin an duh.

Committee on Estimates chairman Lalrinliana Sailo chuan, KMMTTP an zir chianna report chu nimin khan Assembly House-ah a pharh a ni.

Report-a tarlan danin, KMMTTP hi revised a nih avangin cheng vbc. 101.53 hman belh a awm a, ennawn vawi hnihna a awm a nih chuan project atana sum hman tur zawng zawng chu cheng vbc. 1110.32 a ni a; chu vang chuan sum hman belh cheng vbc. 534.63 a awm phah dawn a ni.

Committee chuan an report-ah hian cheng vbc. 534.63 sên belhna tur a awm chhan an hre-thiam thei lo a, "Department kan zawhfiahnaa an thusawite hi kan pawm thei lo. A chhan an sawi zawng zawng hi pumpelh theih-ah kan ngai," an ti a; a hun taka project thawh zawh a nih loh chhan an sawite pawh vên theih veka an ngaih thu an tarlang.

Project a hun taka zawh a ni lo leh revise a ni chu engineer, a hmun hma endiktu leh estimate siamtute thawh ṭhat tâwk loh vangah Estimates Committee chuan an puh a, "Hetiang thil a thleng hian state hmai a tibâl a ni," a ti.

Committee chuan rawtna siamin, revised estimate siamtu engineer zawn chhuah a, project lian thama estimate siam tawh lo turin an duh. Chu bakah, department-in ṭum dangah estimate ennawn a awm tawh lohna atan leh a hun taka hna thawh zawh a nih theihna atan ṭan la se an duh thu an tarlang.

Estimate Committee chuan, KMMTTP chu a hmuna an tlawh ṭumin department lamin kum 2017-a zawh tur anga an hrilh laiin, contractor chuan kum 2018-a zawh tur angin an hrilh thung tih an tarlang a, "Contractor-in zawh hun tur dang daih min lo hrilh hi mak kan ti hle," an ti.

An hmalakna avangin KM-MTTP atana zangnadawmna beisei mi 235-te chu an inhnuh-dawh thu tarlangin Estimate Committee chuan, "ACB report aṭanga a lan danin, LADC hnuaia Revenue department chu LSC pek chhuah kawngah an fimkhur tâwk lo a ni," an ti a; LADC Revenue department chu tun hnuah LSC pek chhuah kawngah fimkhur tawh se an duh thu an tarlang a ni.

Estimate Committee-ah hian Lalrinliana Sailo chairman niin, member-te chu Dr. Ngur-dingliana, Vanlalzawma, T Sang-kunga, R Vanlalvena leh Vanlalawmpuii Chawngthu te an ni.