AIFF president-in MFA fak

All India Football Federation Special General Body Meeting chu nimin khan Football House, New Delhi-ah neih a ni a, AIFF President Praful Patel chuan Mizoram Football Association chu tun hnaia an hnathawh ṭhat avangin FIFA kaltlanga artificial grass pek an nih thu a puang.

AIFF president chuan state asso-ciation-te chu football hmasawnna atana tihtakzeta ṭan la turin a fuih a, India rama state tê ber zinga mi Mizoram hmasawnna chu entawntlak a nih thu a sawi a; tun hnaia MFA hnathawh ṭhat avangin FIFA aṭanga artificial grass chu MFA hnenah pek a nih thu a sawi.

MFA hian Sairang Dinthara MFA khelmualah artificial grass hi phah tumin hma a la mek a, tun hnai khan FIFA Consultant Dr Eric Harrison pawhin a hmunah kalin a endik tawh a ni.

AIFF President chuan India ramah hmeichhe football chawisan tuma ṭan an lak a nih thu a sawi a, kumin chhungin hmeichhe football league ṭan hman an tum.

State association-te chu football hmasawnna tura thawk zel turin a fuih a, state dangte a fuihna kawngah Mizoram hnathawh dan a fak. Kum 2017-a FIFA Under 17 World Cup thleng tura AIFF inbuatsaihna thu a sawi bakah, Prime Minister Narendra Modi pawhin a ngaih pawimawh thu a sawi lang bawk.

AIFF Special General Body Meet-ing-ah hian MFA aiawhin an treasurer Tuikhuahthanga a tel.