KHAWTHLIR

Budget passed

Nimins Assembly Session-ah, kum 2016-17 atana Mizoram budget tura ruahman cheng vbc. 8038.39 chu passed a ni. Kum 2015-16 budget cheng vbc. 7576.56 aiin vbc. 461.82-in a tam. Mizoram Budget Assembly Session neih mek chu vawiin hian a tawp ang.

Mi 1,279 pe

Bairabi- Sairang inkara rel kawng siamah zangnadawmna mi 1,279 hnenah pek a nih tawh thu Transport Minister aiawha zawhna chhangtu minister PC Lalthanliana chuan MNF member K Sangṭhuama zawhna chhangin House-ah a sawi a, "Compensation pek loh Kolasib district-ah chhungkaw 227 an awm bakah, Aizawl district-ah hmaih palh tlem an la awm a, a thara acquire sak tum a ni," a ti.

JRP dil theih

Ministry of Home Affairs chuan mi nunna chhanhimna kawnga thawk ṭhate chawimawina, Jeevan Raksha Padak dawng tur dilna hun a hawng mek a; dawng âwm mite tan August 31, 2016 thleng Mizoram sorkara Home department Under Secretary hnenah dilna leh lehkha pawimawh dangte thehluh theih a ni.

DC meeting

April 1, 2016 khian Assam-a Assembly election lo awm tura Hailakandi district-a venhimna chungchang sawiho turin, Kolasib DC H Lalengmawia leh Hailakandi DC Moloy Bora te chu Manipur Tea Estate, Kaltlicherra, Hailakandi-ah an inkawm dawn. Meeting-ah hian Kolasib SP C Lalzahngoa leh Hailakandi SP-te pawh an tel ang.

Mamit-ah sipai

November 2-6 khian Aizawlah Indian army tur lak runpui neih a ni dawn a, heta tan hian Mamit district aṭanga ṭhalai a tam thei ang ber an tel theih dan tur nimin khan Mamit DC Lalbiaksangi hoin an sawiho. Medical, physical leh document fel loh vanga hnawl an nih loh nan he district chhung aṭanga sipai intlar tur chu screening neih phawt nise an ti.

Theihai enkawl dan inzirtir

Lawngtlaia Horticulture department chuan, March 29-30, 2016 chhung khan Lawng-tlai district-a theihai, Kawlchaw Thei-hai tia hriat lâr chîng-tute tan theihai en-kawl dan leh a nget ven dan zirna an buatsaih.Integrated Pest Management hnuaia zirhona buatsaihah hian Kawlchaw West, Sihtlangpui, Chawn-tlangpui, Saikah leh R. Vanhnea khuaa theihai chîngtu mi 95 an tel a; Lawngtlaia Horticulture officer Lal-hmingmawia Pachuau-in kaihruaiin, Horticulture extension officer R Lalmuanpuii nen thil pawimawhte an zirtir a ni. Theihai sên ṭan mek enkawl zuina tur hmanrua an sem bawk.

Vbc. 20.68 Chawi tawh

Mizorama oil leh gas zawnna aṭang-in company hrang hrangte'n Mizoram sorkarah licence fee cheng vbc. 20.68 an cháwi tawh thu, Industries minister H Rohluna chuan MNF member Lalrinawma zawhna chhangin House a hrilh.