NACO atangin kum 5 chhungin Cheng nuai 7223.81 hmuh a ni

Health minister Lal Thanzara chuan MNF member Lalruatkima zawhna ziaka chhangin, kum nga, 2011-2016 chhungin National AIDS Control Organisation (NACO) aṭangin Mizoramin cheng nuai 7223.81 a hmuh thu a tarlang.

Lal Thanzara tarlan danin, NACO aṭang hian kum 2011-12 ah cheng nuai 1197.51, kum 2012-13 ah nuai 1422.35, kum 2013-14 ah nuai 1365.42, kum 2014-15 ah nuai 1760.3 leh kum 2015-16 ah nuai 1478.23 hmuh a ni a; a vaiin kum nga chhung hian cheng nuai 7223.81 hmuh a ni.

Health Minister chuan, Mizoram State AIDS Control Society (MSACS) chuan harsartna chi hrang hrang pasarih a tawh thu a tarlang.

Mizoramah Targeted Intervention Project chi li kalpui a nih thu sawiin Lal Thanzara chuan, "Injecting drug user (IDU) project 30, female sex worker (nawhchizuar) project pakua, man having sex with man (mipa anpui kawp) project pahnih leh migrants project pali kalpui a ni," a ti.

Health Minister tarlan danin, Targeted Intervention Project hnuaiah hian NGO 27-in project an kalpui a ni.

Health Minister-in MSACS harsatna a sawite

1. Condom promotion chungchangah

2. Hriau (needle/syringe) exchange programme chungchangah

3. Drop-in-centre hriatthiam tawk lohna chungchangah

4. Opiod Substitution Therapy (OST) hmalakna chungchangah

5. ART damdawi la tura kalna senso chungchangah

6. District tinah ART Centre leh CD4 Counting Machine dah tur NACO-in a la pek theih hrih loh avangin HIV veite'n enkawlna la turin harsatna an tâwk.

7. MSACS programme hi hun tiam (time bound) neia thawh ngai a nih avang leh Central aṭanga sum hmuh dan phung thlâk a nih avangin harsatna hrang hrang an tawk a, mahse, India ram state dangte aiin state Treasury aṭanga sum la chhuak hma thei ber zinga mi an ni thung.