Rangvamual leimin ṭhina leivûng Fûr hmain paih zawh hman tum

Disaster Management & Rehabilitation (DMR) minister C Ngunlianchunga chuan, Rangvamuala NH-54 kawngpui chhaka leimin ṭhina leivûngte chu kumin fûr ruahtui tlak hma ngeia paihfai hman tum a nih thu House a hrilh.

MNF member Lalruatkima zawhna chhangin DMR Minister chuan, Rangvamual leimin thenfai hna thawhna atan a vawi khatna atan State Disaster Response Force (SDRF) sum cheng nuai 139 chu Aizawl DC-ah pek a ni a, PWD-in hna an thawh thu a sawi a, "A thawh hnihnaa paihfai mekah hian fûr ruah-tui tlak hmaa thawh zawh tum a nih avangin emgerency-in AIE Construction hnenah DPR buatsaih tura tih a ni a, an ruahman angin leivûng paih hna an thawk mek," a ti.

C Ngunlianchunga chuan, tun-ah hian leimin tawh lohna atan terrace anga lei laih a nih thu sawiin, "Hengte hi a min lohna atan a danna turin lungrem mek a ni," a ti a; Rangvamual leimin ṭhin chu a min tawh loh an beisei thu a sawi.

MPC member Lalthan-liana zawhna chhangin C Ngunlianchunga chuan, Laipuitlang leimin venna atan RCC column siam a la nih loh thu House a hrilh a, "A sum ngai tur a tam tham avangin ngaihtuah mek a ni," a ti a; Laipui-tlang leiminna hmunah hian bialtu MLA fund hmangtea hna thawh a nih avang-in bialtu MLA hnenah lawmthu a sawi a ni.