PSU-a thawkte'n service an chhawm thei dawn lo

Industries minister H Rohluna chuan, public sector undertaking (PSU) tihtawp tak pathuma Early Retirement Rule (ERR) hmanga chhuak ve lote'n an awmna hmasaa an service an chhawm theih dawn loh thu House a hrilh.

MNF member Lalruatkima zawhna chhangin H Rohluna chuan, "PSU tihtawp a nih hnua sorkar hnuaia appoinment pekte hi 'Special Scheme for Appointment of Employees of the Closed PSEs under the Government of Mizoram' tih hnuaia appoint an ni. He scheme hnuaia appointment pekte hi '...will be treated as new employees in all aspects...' tih a ni," a ti.

Industries Minister chuan, PSU-te chu sorkar lakah organisation hrang hlak a nih avangin sorkar hnuaia regular service nei ṭan tur hian PSU hnuaia an service chhawm thei tura ngaih an nih loh thu a sawi a ni.

ERR hmanga chhuak ve lote January 2016 hlawh pek an nih loh chhan sawiin H Rohluna chuan, "Appointment pe tur hian recruitment procedure mumal tak zawh tur a awm a, DPC/MPSC ṭhut leh recommendation lak te, an thawhna tur department-a post ruak identify leh appoinment pek zawng zawng hi thâwk-leh-khata tihfel vek hman a ni lo," a ti.

H Rohluna sawi danin, organisation lamin document-te a hun takah an pe thei lo a, chuvang chuan January thla tîrah appoinment tihchhuah theih a ni lo. An service loh chhunga hlawh pek chu a remchan loh avangin January 2016 hlawh pek an ni lo a ni.