ZPM policy-a tel thlai chi 4 atan cheng vbc. 110 ruahman a ni

Chief minister Lalduhoma duh dan angin Finance department chuan ZPM sorkar policy-in a huam thlai chi li leina turin cheng vbc. 110 an ruahman tih sorkar thuchhuah chuan a tarlang.

CM Lalduhoma hian nimin khan a pisaah Finance department leh Planning & Programme Implementation department hotute a ṭhutkhawmpui a; Finance secretary Vanlal Chhuanga'n Finance department hnathawh dante a sawifiah a, Planning & Programme Implementation secretary Lalmalsawma Pachuau-in Planning hmalak dante a sawi bawk.

Sorkar thuchhuah tarlan danin, Chief Minister-in ṭhutkhawma a duh dan a sawi angin, sawhthing, hmarcha, aieng leh hmunphiah thar chhuahte leina atan Finance department hotute chuan cheng vbc. 110 an ruahman nghal a; Health Care Scheme hnuaia mipui bill tángte pekna atan cheng vbc. 40 ruahman a nih bakah, sorkar hnathawkte November thla hlawh tun thlenga la pek loh chu pek chhuah nghal turin ruahman a ni.

Kum tina zirlaite scholarship pek chhuah hun tlai ṭhin chu kum thar aṭang chuan a hun taka pek chhuah theih dan dap turin CM chuan Finance department hotute a chah a; budget thar ruahman ṭan a hun tawh avangin budget an buatsaihnaah sorkar sum dinhmun dik tak a nihna ang taka dah chhuak turin a chah bawk.

Chief Minister hi chief secretary Dr Renu Sharma leh secretary to chief minister K Lalthawmmawia ten an ṭawiawm a ni.