Mipui beisei ang tihhlawhtlin kan tum dawn - Home Minister: Police-in leiba vbc. 40.23 an nei
Home minister K Sapdanga chuan nimin khan Khatlaa Police Headquarters (PHQ) a tlawh a, police officer-te nen DGP conference hall-a an inkawmnaah, mipuiin an beisei angte tihhlawhtlin an tum dawn thu a sawi. Inkawmnaah hian police-in leiba cheng vbc. 40.23 an nei tih tarlan a ni.
K Sapdanga chuan, Chief Minister-in ni 100 chhunga an tih turte a puan tawh thu sawiin, "CM kaihhruaina hnuaiah mipuiin min beiseina angte tihhlawhtlin ngei kan tum dawn," a ti a, police hotute chu CM-in ni 100 chhunga tih tur a sawia police department kaihhnawihte tihlawhtling turin a chah.
Amah mai chuan mipui beiseina ang a tihhlawhtlin theih dawn loh thu sawiin Sapdanga chuan, "Thawhhona ṭha tel lo chuan department-in hma a sawn lo ang. A tuar tur chu mipui an ni. Mipui himna atana thawk turte kan ni a, mipuiin min en sang. Chuvangin, keimahni vangin mipuite an thlamuang tur a ni," a ti.
Home Minister chuan, ruihhlo donaah theihtawp an chhuah dawn tih sawiin, "Police-te in thawk rim em em tih ka hria. Misualte hi an fing ve zel a, chuvangin hma kan sawn ve zel a ngai. In laka thupek pe ringawt tur ni lo, thawhpui tur che uin ka awm a ni," a ti a, Mizoram hmasawnna atana thawhpuiah a sáwm.
K Sapdanga chuan, ṭul loah sum khawhral loh tur a nih thu sawiin, "Inrenchem taka kan kal a ngai. Sum lâk luhna tur lamte ngaihtuah a, kan resource-te kan hman ṭangkai a ṭul. Kan thil tumte a hlawhtlin theihna atan min puih kan ngai. Engtik lai pawhin in rawtna leh thurawn ka dawngsawng thei reng a ni," a ti.
DGP Anil Shukla chuan police an indaih loh nasat thu sawiin, "Sanction post aṭangin 33% vel hnawhkhah lohin a awm. Police modernisation scheme-ah state-in 10% pawh kan pek theih loh avangin sum hmuh tur la hmuh loh cheng vbc. 9 vel a awm," a ti a, building lamah pawh harsatna an tawh thu a sawi.
IGP (Hqrs.) Lalbiak-thanga Khiangte-in police dinhmun a tarlan danin, Mizoram Police-ah sanction post 12,236 a awm laiin, police 8,086 an awm mek a, post ruak 4,150 a awm. A náwlpuia police lak a nih hnuhnun ber chu kum 2018-ah a ni a, kum 2022 khan compassionate ground-in mi 301 lak a ni.
Tun dinhmunah Mizoram Police-in head hrang hrang pariatah leibá cheng vbc. 40.23 vel an nei mek. Tuialhthei leina tur sum duh angin an nei lo a, thubuai ṭhenkhatah phei chuan a hmunah an kal theih loh phah fo a ni.