KHAWTHLIR
PYD-in thisen pe
Pentecostal Youth Department (North East India), Sertlangpui chuan nimin khan Ṭhuampui UPC biak-inah Lunglei Civil Hospital tan thisen unit 11 an pe a, petute mipa 10 leh hmeichhia pakhat an ni.
MHIP-in chhuang
MHIP Gen.Hqrs chuan thuchhuah siamin, kumina Mizoram inthlanpuiah hmeichhia pathum - Lalrinpuii, Lunglei East, Baryl Vanneihsangi, Aizawl South-III leh Prova Chakma, West Tuipui-te thlan tlin an ni chu an chhuan thu an tarlang a, "Ram rorelna khawla hmeichhiate tana méllung pawimawh tak min siamsaktute hi an kal leh zelna turah leh ram rawng an bàwlna turah duhsakna sang ber kan hlan a ni," an ti.
SEDP board thiat turin file kal
MNF sorkara flagship programme, SEDP hnuaia din board hrang hrangte ṭhiat turin sorkar official-te'n file an kaltir tawh a, board-a thawkte pawh an inthiar chhuak tawh nia thu dawn a ni. Chief Minister-in SEDP Board-te an ṭhiah dawn thu a lo puang tawh a, Resource Mobilisation department erawh ṭhiat tur chuan Cabinet thutlukna a ngai nia thu dawn a ni bawk.
No tolerance drive
Serchhip SP chuan Krismas leh kumthar theng turah mi tinin dam leh hlim tlâng taka an hman theih nan Serchhip khawpui hmun hrang hrangah December 13-20, 2023 chhungin traffic dan bawhchhiate enfiah rûnpui, No Tolerance Drive/Checking neih a nih dawn thu a puang. Lirthei kaihhnawih lehkha pawimawh fel lote chu tifel tur leh enfiah rûnpui chhunga dan bawhchhiate lakah ngaihhnathiamna a awm dawn loh thu a tarlang bawk.
CM leh CS inkâwm
Chief minister Lalduhoma leh chief secretary Dr Renu Sharma te chu nimin khan Chief Minister's Office-ah an inkâwm a; sorkar thil pawimawh hrang hrang leh sorkar tharin hma a lak dan tur ruahmannate an sawi dûn.
Sankalp Yatra
Aizawl DC Nazuk Kumar kaihhruaiin nimin khan DC conference hall-ah Viksit Bharat Sankalp Yatra kalpui dan tur sawiho a ni a; Bawrhsap chuan hmalakna ngai pawimawh turin sorkar department hotute a chah. Viksit Bharat Sankalp Yatra hi mipui hamṭhatna tura sorkar laipui hmalaknate a mamawhtute'n an dawn ngei theihna tura ngawrh zawka puanzarna tur a ni.
Art Exhibition
Lianchhiari Rûn Art Gallery, IPR building-ah nimin khan MADS Annual Art Exhibition 2023 ṭan a ni. Exhibition-ah hian MADS member mi 67-te lemziak leh lemtuk chi hrang hrang pho chhuah a ni a, nimin khan cheng nuai 1 chuang man an hralh a ni.
Halpuah khap
Khawzawl sub-divisional magistrate Lalhruaitluangi chuan, kumin Krismas leh 2024 kumthar vuakvetah hâlpuah, hàlmawi, meithallàwn leh a kaihhnawih thil te, silai lem mu nei chi te, ruih theih thilte kawl, zawrh, hman leh hâlte khap a nih thu a puang.