Tlâk huamin hna kan thawk dawn - CM Lalduhoma

Chief minister Lalduhoma chuan nimin khan ZPM pisaa inkhawmah thu sawiin, ni 100 chhunga an tih tur an puan tawhte chu khawng takin an kalpui dawn a, tlâk huamin hna an thawk dawn tih a sawi.

CM Lalduhoma chuan, Mizoram mipuiin ZPM an enchhin ta a, enchhin zel tur pawhin an duh tih sawiin, "Kan hnathawh aṭangin mipuiin min endik se, sorkar leh tlâka min ngaih theih nan tlâk huamin hna kan thawk dawn. Ni 100 chhunga kan tih tur kan puante khawng takin kan kalpui dawn a ni," a ti.

Mizoram inthlanpuiah a beisei aia tlem ZPM aṭangin an tling tih sawiin, "Kan tlin lohna tam tak chu sum leh pai vang a ni. Sorkar siamtu ni mah ila sum leh pai hmangin vote kan zawng ve dawn lo," a ti a; minority area lamah ZPM tling mumal lo mah se, ram puma rual taka mipui an kal tlàn theih nan thianghlim taka hma an lâk tur thu a sawi.

Lalduhoma chuan, CM-in work department a chan loh tur thu an sawi lâwk angin work department a chang lo tih sawiin, "Bial tin ka enkawlpui vek zawk dawn a ni. Kan dinhmun hi Pathian remruat, kan ṭawngṭai chhànna a ni a, mipui, neutral-te avangin hnehna kan chang a, neutral an tam poh leh ram a kal ṭha dawn a, party ruihchilhna kan kalsan tial tial a ngai," a ti.

Chief Minister chuan, bial tinin minister an duh vek tih sawiin, "Minister bial nih chak hi thil awm dan an hriat tâwk loh vang a ni. Mipui sorkarah chuan minister leh MLA an inthlau vak dawn lo a, MLA-te'n department an enkawl dawn loh avangin bial tan leh ram mipui tan theihtawpin an thawk thei zawk dawn a ni. MLA taima tak bial nih a hlâwk ber zawk dawn," a ti a; sorkar term hmasaah pawh ZPM MLA-te'n ṭha takin hna an thawh thu a sawi.

ZPM chhung inkhawm hi party president Lalliansawta'n a kaihruai a; minister C Lalsawivunga chuan, mipui sorkar ṭha tak an dinzia a chanpual aṭangin lantir a tum thu a sawi. Minister PC Vanlalruata chuan, Agriculture Marketing Board an din thuai dawn tih sawiin, "Mizoram economy siamṭhat a ni dawn a, pawisa nawi hlutna hre thar leh turin hma kan la ang a, bul kan ṭan thar dawn a ni," a ti.

Minister Dr Vanlalthlana chuan, mahni hlawh bâk ak ṭhinte chu kimki turin a chah a, "Ka department chanah hian ZPM party list a awm ve dawn lo. Dâwta na tak taka beih ka tâwk nasa a, thu dik erawh a lang chhuak zel ṭhin," a ti a; minister Lalrinpuii chuan, department a chan tura an pekte hneh leh ṭha taka enkawl turin a intiam tih a sawi.

Minister of state B Lalchhanzova chuan, rawtna ṭha ngaithla turin a inhawng reng tih sawiin, "Mizoram sorkar hi hlimpui kan tum lo a, kan hahpui dawn a, ram hmasawn hi kan duh ber a ni," a ti a; MoS dang Lalnghinglova Hmar chuan, mawhphurhna a chanah a phûrna aiin a huphurhna a sáng zawk tih sawiin, "Kan hlimna hian mi dang hliam lo se tih hi ka duh dan a ni," a ti. MoS Prof. Lalnilawma'n thu a sawi bawk.