Kum tharah kan insiamṭha vek dawn - Zoramthanga

MNF president Zoramthanga chuan, kum tharah MNF party-a siamṭhat ngai zawng zawng an siamṭhat dawn thu a sawi a, an party mite chu zâm loa rilru thar pu turin a chah.

Zoramthanga chuan nimin khan Mizo Hnam Rûna inkhawmah thu sawiin, "MNF hi kum tharah kan insiamṭha vek dawn a, siamṭhat ngai zawng zawng kan siamṭha ang. Rawtna zawng zawng pawh kan ngaithla vek ang," a ti.

Mizoram inthlanpui neih tâk chungchang sawiin Zoramthanga chuan, "MNF party aṭangin MLA 10 lai Pathianin min pe hi a lawmawm hle a, hlawhtling lo zawkah ṭang mah ila, tun inthlan result hi kan ṭhatna tur zawka Pathian remruat a ni tih kan pawm a ni," a ti a; hmun hrang hranga MNF worker-te leh mipui thlàwpna avangin a lawm thu a sawi.

MNF President chuan, hmun hrang hranga an party mite chu zâm lo tur leh rilru thar nen ṭan la ṭheuh tura chahin, "Chak zawkin hei aia ṭha hian kan kal ang a, kan tho kâng leh ngei dawn a ni," a ti a; Pathian remruat dan rual a ni lo tih sawiin, "ZPM sorkar turin Pathian­in rem a ruat a ni tih pawm thiam ila, Pathian­in enchhin ve reng reng a duh a ni," a ti.

MNF sorkar chhungin Mizoram a ṭhat theih nan hmasawnna tam tak an khawih tih sawiin Zorama chuan, "Kan tlin lohna lian takah hian development ṭhat loh vang leh MLA candidate neih ṭhat leh ṭhat loh a ni lo a, Pathianin kan tana rem a ruat a ni tih kan pawm thlap a ni," a ti a; MNF chu hnam thuthlung vuan tlattu a nih avangin an sorkar leh theih nan Pathianin kawng a sialsak leh ngei dawn niin a sawi.

MNF Legislature Party leader Lalchhandama Ralte pawhin thu sawiin, MNF candidate tling lote a tawrhpui thu a sawi a, "Kan tho kâng leh ngei dawn. Kan ram hi rorelna pakhat hnuaiah MNF hi kan ding chhuak leh ngei dawn a ni," a ti.

Inkhawmah hian MNF MLA tling tharte hnenah chawimawina leh lawmpuina an hlàn a ni.