Kuminah NAS-in mi 1,656 phur tawh

Sorkar kum kal mekah October 2023 thleng khan National Ambulance Service (NAS) ambulance hmangin Mizoramah damlo 1,656 phurh an ni tawh.

NHM hotute aṭanga thu dawn danin, NAS hmang hian nu, nau nei turte leh nausên kum khat la tling lote an in leh sorkar damdawi-in inkarah a thlàwnin phurh theih a ni a; NAS ambulance mamawh tan call centre phone number 102 call/dial tur a ni a, a man chawi a ngai lo a, eng lai pawhin chhángtu tur an awm reng a ni.

NAS hi March 2013 khan Mizoramah kalpui ṭan a ni a, district pariatah kalpui mek niin, district thar pathumah erawh kalpui a la ni lo.

Tun dinhmunah ambulance motor 62 Mizoramah a awm mek a, mahse, ṭhenkhat chu a hlui tawh a, thingtlang kilkhawr leh kawng chhe tak taka tlân turin a ṭha tâwk tawh lo hle tih NHM hotute chuan an sawi.

April - October 2023 chhungin Mizoram pumah NAS hmangin mi 1,656 phurh an ni tawh a, chu'ngte chu nu nau pai 509, nausén 90, nu/naute khawsik 168 leh thil dang vanga phurh mi 889 an ni. Mi 1,656 phurhnaah an ambulance-te chu km. 85,257-a thui an tlân a ni.