Lammualah Winter Festival ṭan

Tourism minister Lalrinpuii chuan nimin khan Lammualah Winter Festival 2023 cum Mega Exhibition a hawng a; India hmarchhak tlawhtu khualzinte aṭangin Mizoramin tlawhtu a neih tlem thu a sawi.

Lalrinpuii chuan, Winter Festival chu Mizote kutchhuak leh kutthemthiamnate pho chhuahna remchang a nih thu a sawi a, "Tourism hi industry a nih angin eizawnna ṭha a ni a, amaherawhchu, India hmarchhak tlawhtu khualzinte aṭangin Mizoram chuan 0.01% chauh tlawhtu kan nei a, hei hi chona min petu ni se ka duh," a ti.

Ṭhalaite'n eizawnna tluan­tling an neih theih nan tourism industry kaihhnawihah training buatsaih an tum thu sawiin Lalrinpuii chuan, "Zin mite enkawlna (tourist management)-ah hmalak a ni dawn a, tourism hi smokeless industry a nih angin sik leh sa vawnṭhat nan pawh a pawimawh hle a, kan ram economy ṭhan zelna tura kalkawng pawimawh tak a ni," a ti a; tourism hnuaia thawk zawng zawngte nasa lehzuala ṭang turin a chah.

Festival cum Exhibition hawnna inkhawmah hian cheraw, hlado, chheih zai bakah zaipawl, band leh malzaite entira ngaih­thlak a ni a; Mizo kutchhuak thiamthil hrang hrang leh ei leh in tur chhawpna stall 100 siam a ni. Festival hian December 16, 2023 thleng a awh ang.