Champhai Bawrhsapin khaw pathum a tlawh

Champhai district bawrhsap James Lalrinchhana chuan nimin khan Vanzau, Zawngtetui leh Bungzung khua a tlawh a, khawtlang hruaitute leh tlawmngai pawl hrang hrang aiawhte kawmin, khawtlang mamawhte a hlan nghal.

James Lalrinchhana chuan, khawtlang hruaitute chu rual elna dik nei chunga ṭan la tur leh hmathlir thui tak neia khawtlang mamawh leh ṭulte ngaihtuah ṭhin turin a chah a,"Zirna dah pawimawh hmasa ber ula, faina aṭanga inṭan hriselna ngaipawimawhin, ramngaw leh nungcha humhalh kawngah ṭan la zel ang che u," a ti a, ruihhlo laka ṭhalaite an fihlim theih nan infiamna hmanga chona siam tum turin a chah nghal.

Ram leh hnam innghahna ni mai tur ṭhalaite tan khawvel hmabak êng tak siam tura ṭanho a pawimawh thu sawiin Bawrhsap chuan, "Khawvel changkang chho zelin a ken tel information technology lama hmasawnna hrang hrangte an inzir ve zel theih nan sikul zirtirtute leh khawtlang hruaitute'n theihtawp in chhuah ho a pawimawh," a ti.

Bawrhsap hian Vanzau, Zawngtetui leh Bungzung khua leh a chhehvela hmunhma pawimawh hrang hrang - health sub-centre, primary school, middle school, high school, anganwadi, infiamna hmunhma, community hall, YMA hall leh inkalpawhna kawngte a tlawh a; khawtlang hruaitute chu an mamawhte sawipuiin, mamawh an thlente tihpuitlin a nih theih nan theihtawp chhuahpui a tum thu a sawi.