Minister-te'n an pisa an luah lut ṭan

Mizoram sorkar thar, December 8, 2023-a lak luh tâka minister tam zawk chuan nimin khan Secretariat-a an pisa ṭheuh an luah ṭan a, Pathian hnena inhlanna hun an hmang.

Home minister K Sapdanga chuan a pisa a luah luh puala inkhawm tâwi hmannaah kalkhawmte chu ram leh mipui rawngbawl kawnga theihtawp chhuahpuiah a sáwm. Synod executive secretary Rev. Dr K Lallawmzuala'n hunserh a hmang a, kalkhawmte inhmelhriattirna hun hman a ni.

PWD minister Vanlalhlana'n a pisa a luah luh puala inkhawm tawiah Rev. Lalremruata Ralte-in hunserh a hmang a; Vanlalhlana chuan, ram leh mipui hmasawnna atana theihtawp a chhuah zel dawn tih a sawi a, "Department lian leh pawimawh tak enkawl tura mawhphurhna pek ka ni hi chona lian tak a ni dawn a, mipui rawngbawlna leh ram siamna kawngah thuràwn leh fuihna ka mamawh hle dawn a ni," a ti.

LAD minister C Lalsawivunga chuan a pisa thar a luah ṭan puala inkhawmah Rev. John Raldosanga'n hunserh a hmang. Minister chuan, "Ram rorelnaah Pathian ram tun din hi kan sorkar thil tum pawimawh berte zinga mi a ni a, ka department palite pawh an hnathawh chu mipui leh kut hnathawktute thleng phak ni ngei turin ka duh," a ti a; a mawhphurhnate Pathian chakna ringin hlen chhuah a tum thu a sawi.

Forest minister Lalthan-sanga'n a pisa a luah ṭan ni-ah Upa Zothlamuana'n hunserh a hmang. Lalthansanga chuan, "Ka department enkawl tur palite hi department pawimawh tak tak a nih angin project siam kawngah pawh ṭan lâk nasat a ngai dawn hle a, department ka enkawl hnuaiah eirukna leh hlemhletna a awm a rem lo," a ti.

Minister Dr Vanlalthlana pawhin a pisa thar a luah lut a, Rev. Dr Vanlalnghaka Ralte-in hunserh a hmang. Vanlalthlana chuan, hun kal zelah finchhuah ṭhin turin kal khawmte a chah.

Agriculture minister PC Vanlalruata'n a pisaa a luah ṭan ni puala inkhawmah Upa Lalnunsiama Kawlni-in hunserh a hmang a, an ṭawngṭai rual.

Health minister Lalrinpuii'n a pisa thar a luah luhna inkhawmah Rev. Dr K Thanzauva’n hunserh a hmang. Lalrinpuii chuan, a mawhphurhnate chu Pathian ṭanpuinain sorkar hnathawk leh mipui ṭawiawmna nen ṭha taka hlen a inbeisei thu a sawi a, "Ka enkawl tur department pathumte pawh dik leh langtlang takin thawhhona ṭha nen theihtawp chhuah ka tum," a ti.

Power & Electricity minister F Rodingliana'n a pisa thar a kai ṭanna inkhawmah Col. Lalhmingliana'n hunserh a hmang. Minister chuan, "Pathian rinchhan tlat chung leh mipui ṭawiawmna telin Zoram tan malsawmna thlentu nih ngei ka tum," a ti a; FCSCA minister B Lalchhanzova pisaah Upa S Lalthanga’n hunserh a hmang a; Lalchhanzona chuan, a department enkawl tur pahnihte enkawl dan tur mumal taka ruahman a nih tawh thu a sawi.

Sports minister Lalnghinglova Hmar-in a pisa a luah ṭan ni-ah Rev. R Lalawmpuia'n hunserh a hmang a; Minister chuan, bul an ṭan chauh a, kawng thui tak zawh tur a awm tih a sawi a; vènpui leh ṭawngṭaipui a mamawh thu sawiin, "Kan inpui tawn ang a, kan inpuihtawn loh chuan kan mualpho thei. Ṭhalai kaihhnawih department pathum ka chang dawn a, heng zawng zawng kan tihnaah dik taka kan kal theih nan min venpui a, min ṭawngṭaipui turin ka sáwm a che u," a ti.