Constructive opposition nih kan tum - Opposition Leader

Nimin Assembly session-ah opposition leader Lalchhandama Ralte chuan constructive opposition (sorkar khalh nghiltu) nih an tum thu a sawi.

Lalchhandama Ralte chuan, Pathian leh mipui duh thlanna angin ZPM kaihhruai sorkar a piang tih a sawi a, "Kan lawmpui a, ram tana ṭha turah chuan kan thláwp tlat dawn. Constructive opposition nih kan tum. Chutih rualin, kan ram leh hnam tana ṭha lo turah chuan he house aṭang hian nasa takin kan dodal dawn. Mipui thlavâng kan hauh dawn," a ti.

Opposition Leader chuan, Speaker thlan chungchang sawiin, "Speaker dinhmun hi zahawm leh pawimawh tak a ni. Oppostion tan phei chuan kan pa ber, kan inpui, engkim kan thlenna hmun a ni. Mizoram sorkar protocol-ah pawh chief minister dawh chiah a ni," a ti a, speaker dinhmun chu a pawimawh avangin veteran politician leh senior-te dah an nih ṭhin thu a sawi.

Tun ṭumah pawh house zahawmna vawng turin senior MLA aṭanga speaker dah an lo beisei thu sawiin Lalchhandama chuan, "Speaker kaihhruainaah house zahawmna a innghat. Kan hriat dan chuan House Leader pawhin senior member aṭangin speaker tur a zawng a, luah tur a hmu zo lo niin kan hria. Chu ai chuan a mawm zawkte kan zuan emaw ni, corruption free sorkar siamtuteah hian mi tihlauhthawng lek lek," a ti.

Opposition Leader hian an beisei ang speaker atan dah a nih loh thu a sawi rual hian speaker thar chu theihtawpa an thlàwp dawn thu a sawi bawk a ni.