MLA hlawh tihpun a ni dawn lo - Chief Minister
Nimina Assembly session-ah House leader Lalduhoma chuan, sum dinhmun a chhiat avangin inrenchemna lam an kalpui nasa dawn a, term hmasa lama MLA-te'n an neih ṭhin, tun term-a an neih theih loh tur a awm thu leh MLA hlawh tihpun a nih dawn loh thu a sawi.
Lalduhoma chuan, MLA-te chu hruaitu an nih angin mipui hmaah hma an hruai a ngaih thu a sawi a, "Kan sum dinhmun kan hria a, austerity measure (inrenchemna) kan lâk viau a ngai dawn. Term hmasa lama member-te'n kan lo enjoy ṭhin eng eng emaw kan enjoy tawh dawn lo a, hlawh pawh tihpun a ni dawn lo," a ti.
House Leader chuan, "Tun hma lamin kan bial chhunga department hrang hrangin hma an lakna copy-te MLA-te'n kan hmu ve ngai lo a, dap chawp a ngai ṭhin a, zawn chawp a ngai ṭhin a, tun aṭang chuan bial tina department tinte'n hma an lakna copy hi kan member zawng zawng pek ṭhin a ni tawh dawn," tiin a sawi.
Inelna thianghlim nei tura House member-te chahin Duhoma chuan, "Mahni bial ṭheuh enkawlnaah inelna thianghlim nei se la, ruling leh opposition thliar hrang loin he sorkar hian bial tinte'n khai rual taka hmasawnna kawnga ke an pên theihna turin theihtawp kan chhuahpui ṭheuh dawn a ni," a ti.
Chief Minister chuan, MLA-te chu zirlai exam tur anga ṭanga inzir reng ngai an nih thu sawiin, "Zir zawh a awm thei lo. Taimak leh thawhrim a pawimawh em em. Thil thar kan la tawn ngai loh, hriat thar tur zir tur kan ngah. Session vawi khatna aṭangin taima leh taima lo chu kan hriat dawn a ni," a ti a; Parliament-in MLA-te tana orientation course-te a buatsaih hunah tel ngei turin member-te a chah.
Chief minister ni tawh Ch Chhunga, Brig. T Sailo, Laldenga, Lal Thanhawla leh Zoramthanga te a hrawn vek tawh thu sawiin Duhoma chuan, "An hnen aṭang hian thil tam tak ka zir," a ti a, a lawm thu a sawi. Term thum chhung opposition leader niin Lal Thanhawla leh Zoramthanga te a hrawn tawh thu sawiin, "Anni nen hian house-ah hian tradition ṭha tak kan hnutchhiahin ka hre ve a, an chungah lawmthu ka sawi. Vawiinah pawh tradition ṭha tak kan hnunga lo kal leh turte tan kan hnutchhiah ka beisei," a ti.