Airport-a VIP lirthei chauh Tlân luh phalna hmun tibo

Lengpui Airport terminal building kawta VIP-te lirthei chauh tlân luh phal ṭhin chu nimin aṭang khan tihbo a ni a, terminal kawta lirthei tlan luhna tur gate bula 'restricted entry' tih tár ṭhin pawh lak bo a ni tawh.

GAD (Aviation Wing) chuan December 11, Thawhṭanni khan thuchhuah siamin, sorkar hotute aṭanga thu an dawn angin Lengpui Airport-a khualzinte luh dan chungchangah thil tihdanglam a nih dawn thu an tarlang.

GAD chuan an kal mek dan, VIP luhna bik leh passenger/staff-te luhna bik chu December 12 aṭang chuan hmun khatah chhûn fin tawh tur a nih dawn thu a tarlang a, "Chuvangin, he lai hmuna airport staff-te'n lirthei kan dah ṭhinnaah hian dah chhunzawm a rem tawh dawn lo a ni tih kan inhriattir e," an ti.

Airport-a thawkte'n lirthei an dahna ṭhin chu dropping zone-ah a tluanin hman a ni tawh dawn tih tarlangin GAD chuan, "Chuvangin, Airport staff zawng zawngte'n kan lirtheite parking area-ah dah tawh turin kan inngenin kan inhriattir a ni," an ti a, thupek chu zâwm ṭheuh turin an inhriattir bawk.

Tarlan tawh angin December 8, 2023-a Aizawl Press Club a tlawh ṭumin Home minister K Sapdanga chuan, Lengpui Airport-a pawn lam thlenga inthliarna awm chu tihtlem ṭhaa a hriat thu sawiin, "Airport-ah pawn lam thlenga VIP leh VIP lo inthliarna awm khu ka rilruah a awm em a, a hranpa-a chet ngai loa chinfel ka duh hle a ni," a ti.