Speaker-in a pisa a luah ṭan

Mizoram Legislative Assembly speaker Lalbiakzama chuan nimin khan a pisa a luah lut a, thuthar thehdarhtute a kâwm nghal. Speaker a nih chhungin dik leh khairual taka Assembly rorelna kalpui a tum thu a sawi.

Lalbiakzama chuan, speaker tura thlan a ni chu a insit thu leh Pathian remruat a ni tih hriaa theihtawp chhuah a tum thu a sawi a, "Fair tak leh inkhairual takin dan hnuaiah rorelna kalpui ka tum a, neutral takin Assembly rorelna kaihhruai ka tum ang. ZPM sorkar lak luh nía kan CM-in press mite a kawmnaah khan ZPM hmachhawp leh kal tum dan ṭhenkhat a puang tawh a, he sorkarin ram kalpui a tum dan thui tak a hriat theih. Sorkarin ruahmanna ṭha tak neiin tumna tak tak nen thil kalpui mah se, a hlawhtlinna chu mipuiah a innghat tlat a ni," a ti.

Zelthel leh awlsam taka sum lak luh tumna te, felfai chiah loa sum beiseina te, ṭangkai lo taka hun hman ṭhin te, nun uluk lo taka awm ṭhinna te chu bo tawh se a duh thu sawiin Speaker chuan, "A awlái lo ang a, a chho deuh pawh a ni ang, mahse, kan ti thei a ni ti tlâng ila, malsawm tlaka kan hunte kan hman chuan malsawmna kan dawng dawn a ni," a ti a; mahni tih theih reng sorkar tih tura dah tlatte leh a thlawna dawng tura inngaihna awm ṭhinte chu kalsan a hun tawh thu a sawi.

Lalbiakzama chuan thuthar thehdarhtute chu thawhpuiah a sâwm a, thurawn leh hriat duh neite tan engtik lai pawha a inhawn reng thu a hrilh a ni.

Thuthar thehdarhtute a kawm zawh hian Lalbiakzama hian Mizorama Assembly speaker hmasa ber Dr H Thansanga tlawhin, a thurawn a la. Damlohna avanga Synod Hospital-a awm mek Dr H Thansanga hian Lalbiak­zama hi a lu chunga kut nghatin a lo ṭawngtaisak a ni.