Synod zirchiannaah kohhran inkhawm a tam ti aiin a tam ti lo an tam zawk

Mizoram Presby­terian Kohhran chuan kohhran inkhawm tihtlem rawtna chung­changah kumin chhungin zirchianna an kalpui a, kohhran mipuiah zawhna inang chhan tur (questionaire) thawn chhuah niin, chhangtu zinga a tam zawkin kohhran inkhawm kalpui mek chu a tamah an ngai lo.

Kum 2022 Synod inkhawmpuiah Aizawla presbytery pakhat aṭangin inkhawm tihtlem rawtna (agenda) a lut a, Synod inkhawmpui chuan hnâwl loin, Synod Executive Committee bawhzui turin an dah. SEC chuan a bawhzui a, Research & Evaluation Wing (REW) zir chian turin a dah ve leh a ni.

Synod inkhawmpui neih zawh taka tarlan danin, REW chuan pastor bial tinah questionaire a thawn chhuak a, kohhrana inhmang deuhte leh inhmang lem lote pawh chhantir an ni a, mi 10,258 chhanna a lut.

Questionaire aṭanga a lan danin, zawhna chhangtu 10,258 zinga a zatve aia tam 52.3%-in kohhran inkhawm kalpui mek chu a tam an ti lo a, mi 5,293 an ni a; mi 4,014 (39.4%) chuan a tam an ti thung a, ngaihdan nei lo mi 829 (8%) an awm.

Kohhran inkhawm a tam titu zinga 34% chuan inkhawm titlem a ṭul an ti lo a; inkhawm a tam ti lo leh a tam ti zinga inkhawm paih ṭhen ṭul ti lote leh ngaihdan nei lote zingah inkhawm tihtlem (paih ṭhen) ṭul ti lo zat belhkhawm chu 68% a tling.

Aizawl khawpui bikah chhangtu zinga 49%-in inkhawm a tam an ti a, 43%-in inkhawm an tam an ti lo thung a, ngaihdan nei lo eng emaw zat an awm. Aizawl páwn lamah erawh chuan inkhawm a tam ti lo 56% dáwn an awm a, inkhawm a tam ti 36% vel an awm.

Inkhawm paih ṭhen ni dawn ta se, Pathianni chawhnu inkhawm paih ṭhen duhtu tam berin, 32% vel an ni a, a dawttu chu Inrinni zan inkhawm niin, 14% vel a ni.

Questionaire chhangtute chu mipa 65% leh hmeichhia 32% an ni a, a bak chuan an nihna an ziak lang lo. Chhangtute kum chawlhrual chu 48 vel a ni a, kum 50 bawr vel an tam ber a, a upa ber kum 89 a nih laiin, naupang ber chu kum 14 a ni. Chhangtu zinga hlawm hrang hrang ṭhenah kohhrana chanvo sawi tur nei lo an tam ber a, mi 10,258 zinga 3,337 (32.4%) an ni.