Ruihhlo, hàlpuah leh a kaihhnawihah ṭan la turin CYMA-in mi tin a ngen

Central YMA chuan, Krismas leh kumthar vuakvêtah ruihhlo, hàlpuah leh a kaihhnawih thil hrang hrang leh silai lem (a mu kap chhuak thei) chungchangah theihtawp chhuaha ṭan la turin YMA branch tin leh mipui an ngen.

CYMA hian nimin khan thuchhuah an siam a, "Krismas leh kumthar hunpuiah hian ruihhlo chi hrang hrang a hluar ṭhin avangin theihtawp chhuaha heng thil ṭha lote do tlâng turin mi tin kan inngen a. YMA branch-te pawh mahni huam chhungah theihtawpa ṭan la turin kan ngen a ni," an ti.

Halpuah leh halmawi chi hrang hrangte chu mihring hriselna atana hlauhawm leh mi tina theih a nih bakah, ṭul loa sum tam tak sènna a nih avangin zuar lo tur leh lei lo turin Central YMA chuan mi tin an ngen.

CYMA chuan, "Nu leh pate'n Krismas puala kan fate infiamna hmanrua kan leisak hian, silai lem (a mu kâp chhuak thei)-te hi mi tina thei a nih avangin leisak lo tur leh sumdawngte pawhin zuar lo turin kan inngen a ni," an ti bawk.